Өнөө жилийн сар шинийн баяраар орон нутагт цасан шуурга шуурч, авто замаар зорчиход хүндрэлтэй байлаа. Тиймээс Онцгой байдлын ерөнхий газрын даргын тушаалаар энэ сарын 18-ны өдрийн 10.00 цагаас 23-ны өдрийн 10.00 цаг хүртэл Онцгой байдлын асуудал эрхэлсэн байгууллагыг албаны өндөржүүлсэн бэлэн байдлын зэрэгт шилжүүлэн ажиллаж байна. Мөн сар шинийн өдрүүдэд буюу хоёрдугаар сарын 20-ны өдөр нутгийн зүүн хагаст цас орж, салхи говь, тал хээрийн нутгаар 18-20 м/с хүрч ширүүсэн хүйтний эрч өмнөх өдрүүдээс эрс чангарсан тул Шадар сайд, ОБЕГ-ын дарга У.Хүрэлсүхийн тушаалаар энэ сарын 20-ны 23.00 цагаас 21-ний 07.00 цаг хүртэл Дархан-Уул, Орхон, Сэлэнгэ аймгуудын замын хөдөлгөөнийг түр хязгаарласан бол өчигдөр буюу энэ сарын 21-ний 07.00 цагаас 22-ны 07.00 цаг хүртэл Дорнод, Дорноговь, Сүхбаатар чиглэлийн орон нутгийн замын хөдөлгөөнийг түр хязгаарласан юм.
Өнөөдөр орон нутгийн замуудын хязгаарлалтыг цуцлав. Гэсэн хэдий ч цасан шуургын улмаас зам халтиргаа, гулгаатай байгаа учраас жолооч нар орон нутгийн замын хөдөлгөөнд хурдаа тохируулан эгнээ байраа зөв эзлэн оролцохыг Замын цагдаагийн газраас анхаарууллаа.