Стандарчлал хэмжил зүйн газрын Цаг давтамж, уртын нэгдсэн лабораторын мэргэжилтэн Г.Батзаяагаас цаг урагшлуулахтай холбогдуулан тодруулга авлаа.
–Монгол улс зуны цагийн тоололд шилжих тухай Засгийн газрын тогтоол гарсан байгаа. Энэ тал дээр СХЗГ ямар арга хэмжээ авсан бэ?
-Манай байгууллагын Цаг, давтамж уртын нэгдсэн эталон лабораторид Монгол улсын эталон цагийг гаргаж хадгалах үйл ажиллагаа явуулдаг. 2011 оноос эхлэн СХЗГ болон ХХЗХ хамтран сүлжээний цагийн серверийг ажиллуулаж байгаа ба иргэд, албан байгууллагууд Монгол улсын эталон цагийн дохиог интернетийн сүлжээг ашиглан микро секундын нарийвчлалтайгаар өөрсдийн цахим төхөөрөмжүүдэд хүлээн авах боломжтой болсон бөгөөд иргэд цагийн дохиог хүлээн авахдаа өөрсдийн ашиглаж байгаа төхөөрмжийн internet time server –ийн хаяг дээр time.icttime.mn гэсэн хаягийг оруулаж өгснөөр эталон цагийн дохиотой синхрон хийгдэх юм. Зарим төхөөрөмжийн хөтлөгч цаг нь дохио хүлээн авсан ч гэсэн цагийн бүсээс хамааран цаг өөрчлөгдөхгүй тохиолдол байдаг тул өөрсдийн time zone –ийн тохиргоон дээр UTC+9 гэсэн бүсийг сонгож оруулах хэрэгтэй. Тодорхой зааврыг www.masm.gov.mn гэсэн вэб хуудсанд хандан харах боломжтой.
–Иргэд гар утас болон өөрсдийн өдөр тутмын ашигладаг цагнуудаа хэрхэн тохируулах вэ. Заавал шөнийн 02:00 цагт шилжүүлдэг нь ямар учиртай юм бол. Тохируулахад тогтсон цаг хамаатай юу?
-Иргэд өөрсдийн бугуйн цаг болон гар утасны цагуудаа зуны цагийн хуваарьт шилжүүлэхдээ өөрсдийн цахим төхөөрөмж юмуу хэрэглээний цагуудаа хуучин мөрдөгдөж байгаа цагийг гар аргаар 1 цагаар нэмэгдүүлэж тааруулна гэсэн үг. Цаг шилжүүлэхэд тогтсон цаг гэж байхгүй бөгөөд заавал шөнийн 02:00 цагт шилжүүлдэг учир нь зуны цагийн тоололд шилжих үед иргэдийн үйл ажиллаанд чирэгдэл учруулахгүйн тулд олон нийтийн хөдөлгөөн намжих үеийг сонгон авч тогтоосон юм.
–Манай цаг зарим улс орнуудын цагтай зөрүүтэй явдаг. Энэ зөрүү яаж өөрчлөгдөх бол?
-Манай улс олон улсын цагийн UTC+8 дүгээр бүсийн цагийн баримталдаг байгаа. Зуны цагийн тоололд шийлжсэнээр нэг цагаар урагшилж UTC+9 дүгээр бүсийн улсуудын цагтай адилхан болсон. Жишээ нь Москва хотын цаг Улаанбаатрын цагаас 5 цагын зөрүүтэй байдаг байсан бол одоо 6 цагийн зөрүүтэй мөн Бээжин хотын цагаас 1 цагаар түрүүлж явах болсон гэж ойлгож болно.