Өчигдрийн байдлаар Сингапур хот улс дахь Зика вирусын халдвар 115-д хүрснийг мэдээлсний дотор анхны хөл хүнд эмэгтэй багтжээ.
Наймдугаар сарын 27-нд Сингапур анхны дотооддоо дамжсан халдварыг илрүүлж байсан бол 29-ний өдөр халдвар авсан хүний тоо 82 хүрч огцом нэмэгдсэн юм.
Тэгвэл өөр нэг аюултай мэдээ нь эдгээр халдвар тээгчдийн дотор Хятад болон Энэтхэгийн олон тооны иргэд багтсан байна. Энэтхэгийн гадаад хэргийн яам өчигдөр 13 Энэтхэг хүн халдвар авсныг мэдээлсэн бол Хятадын 21 иргэн мөн багтжээ.
Хүн амаараа дэлхийд тэргүүлдэг хоёр гүрэнд Зика дамжвал ямар аюул болох нь ойлгомжтой.
Эдгээр хүмүүс нь Сингапурт барилгын ажил гүйцэтгэж байгаа ажилчид юм байна.
Халуун орны шумуулаар дамждаг Зика вирус нь бас хүнээс хүнд бэлгийн замаар дамждаг нь батлагдсан юм.
Энэтхэг болон Хятадын жуулчид Сингапурт ирдэг нийт жуулчдын голлох хэсгийг бүрдүүлдэг аж. Тухайлбал өнгөрсөн онд Энэтхэгээс нэг сая жуулчин хот улсад ирсэн байдаг.