Танил маань сонгосон мэргэжлээрээ гадаадад эрдмийн зэрэг хамгаалж ирээд удаагүй ч гурван ажил сольчихов. Эхний удаад удирдлагууд нь таагүй хандсан гэнэ. Дараагийн ажлынх нь орчин таалагдаагүй юм байх. Сүүлд орсон байгууллагын ажилтнууд өөртэй нь хүндэтгэлгүй харилцаж байснаас ажлаа сольжээ. Одоо тэр дөрөв дэх ажилдаа орох гэж байгаа. Сурсан сургуулийн дипломыг нь хараад, мэдлэгийг сориход танил маань хаана ч гологдохгүйг дөрөв дэх ажилдаа саадгүй орж байгаагаас харчихаж болно. Гэхдээ түүнд ажлынх нь дарга, хамт олон эсвэл офисс нь таалагдахгүй болмогц дараагийн ажлаа бодож эхэлдэг гэмтэй. Мань хүн тогтвортой ажил хийхэд мэдлэг нь бус, зан хандлага нь саад болоод байгаа харагддаг.
“Зан чанарыг ажилд авч ур чадварыг эзэмшүүл” гэж “Porsche” компанийн ерөнхий менежер асан Петер Шуц хэлсэн байдаг. Шинэ орчинд дасах, хүмүүстэй зөв харилцах, сэргэлэн байх зэрэг хувийн зан чанарыг насанд хүрсэн хүнд сургах боломжгүй гэнэ. Тухайн хүний гэр бүлийн хүмүүжил, зуршлыг удирдах албан тушаалтан, хамт олон нь засахад хэцүү. Хамт олны дунд нэг л эвгүй зантай хүн байхад бусдадаа нөлөөлдөг нь харагддаг. Нэг өглөө танхим дүүрэн хэрүүл дэгдээж, нэгийг нөгөөд элдвээр ярихад л хамт олон бужигнаж, бухимдаж эхэлдэг жамтай. Эндээс сөрөг уур амьсгал давамгайлж, эерэг хандлага түлхэгдэжэхэлдэг. Болохгүй, бүтэхгүй зан хандлагыг нь хэлэхээр гадуурхлаа, ялгаварлалаа гэж хүлээж авдаг хүн олон. Энэ нь багаас төлөвшсөн зан хандлагаа засах чадваргүйгээ харуулж байгаа хэрэг. Харин зөв зан чанартай хүнд ур чадвар эзэмшүүлэх, сургах боломжтой гэдгийг Петер Шуц хэлсэн нь тэр. Сэтгэл, зүтгэл байхад юу ч бүтээх боломжтой гэдэг үг ч бий.
Б.ЦЭЦЭГДЭЛГЭР