Жил бүр уламжлал болгон зохион байгуулдаг залуу монгол судлаачдын зуны сургалт үргэлжилж байна. Манай улс гурав дахь жилдээ зохион байгуулж байгаа тус сургалтад Орос, Герман, Швейцар, Чех, Унгар, Польш, Турк, Казахстан, Хятад, Япон, БНСУ, БНАСАУ зэрэг 12 орны 30 залуу судлаачид хамрагдаж байна.
Энэ удаагийн зуны сургалт хоёр хэсгээс бүрдэж байна. Эхний ээлжинд судлаачид малчны ахуй амьдралын дунд монгол бичгийн хэл, монгол ярианы хэл, монгол ахуйтай танилцах хичээлийг үзэх бол хоёрдугаар хэсэгт Улаанбаатар хотод ирж Шинжлэх ухааны академийн хэл зохиолын хүрээлэн, Түүх археологийн хүрээлэн, Монгол Улсын боловсролын их сургууль зэрэг монгол судлалын гол төвүүдэд сургалтад хамрагдах юм.