Окинава аралд шинээр АНУ-ын цэргийн бааз байгуулахыг эсэргүүцсэн олон мянган хүн Токио дахь парламентын ордныг бүсэлжээ. Жагсаалд 28 мянга орчим хүн оролцсон байна. АНУ-ын цэргийн баазын бүтээн байгуулалтын ажил нь өмнөд хэсгийн Окинава арал болон Токиогийн засгийн газрын хооронд маргаан үүсгэжээ.
Японы газар нутгийн нэг хувьд ч хүрэхгүй Окинава аралд Япон дахь АНУ-ын цэргийн байгууламжийн 75 хувь нь оршдог аж. Гэтэл Японы засгийн газраас Окинава аралд шинээр АНУ-ын тэнгисийн цэргийн агаарын бааз байрлуулахаар төлөвлөж байгаа нь оршин суугчдын эсэргүүцэлтэй тулжээ. Шинэ баазыг “Футенма” агаарын баазын оронд байгуулахаар төлөвлөсөн аж. Харин Окинавагийн оршин суугчид “Футенма” агаарын баазыг арлаас гаргах хүсэлтэй байна. Оршин суугчид АНУ-ын цэргийн баазууд дахь дуу чимээ, осол аваар, заримдаа гардаг гэмт хэргийг цаашид тэвчихгүй хэмээн эсэргүүцжээ.