Москвагийн гудамжинд Алексей Навальныйг суллахыг шаардаж жагссаар байна.
Жагсагчид “Навальныйг сулла”, “Путин яв” гэх зэрэг лоозон баоьсан байна. Нэг эмэгтэй “Орос орон шорон болж хувирч байгаа тул би энэ жагсаалд
оролцож байна” гэжээ.
Ийнхүү Оросын Холбооны Улс дахин дэлхийн хэвлэлүүдийн халуун сэдэв боллоо. Москвад төдийгүй хойд хөршийн олон хотод цуст мөргөлдөөн үргэлжилж байна. Путины хэт их эрх мэдлийг эсэргүүцсэн Орос залуус үзэл бодлоо илэрхийлж, тэмцлийг өрнүүлжээ. Ройтерс 40.000, Оросын төв телевиз 4000 орчим иргэд гудамжинд жагссан гэж мэдээлсэн боловч энэ бол бодит байдлыг мушгин гуйвуулсан, зохиомол тоо баримт гэж дэлхийн хэвлэлүүд онцолж байна. Үүнээс хэд дахин олон хүн жагсаалд оролцсон бөгөөд одоо ч Орос залуус сэтгэл зүрхнээсээ жагсаалд нэгдсээр байгаа гэжээ.
Навальныйг суллахыг шаардсан жагсаал зөвхөн Москва төдийгүй Хабаровск, Владивосток, Красноярск, Сибирь, Алс Дорнодын томоохон хотуудад мөн зохион байгуулагдсан байна. Тэр бүрт орон нутгийн цагдаагийн байгууллагынхан хэв журам сахиулж, олон арван идэвхтнийг баривчилжээ. Тэдгээр хотуудаас Новосибирск хотод 4500 орчим хүн оролцсон хамгийн том жагсаал болсон гэнэ.
Навальный өнгөрсөн оны наймдугаар сард хордсоноосоо болж Германд очин эмчлүүлж байгаад өнгөрсөн долоо хоногт нутагтаа эргэн ирсэн билээ. Гэвч түүнийг эдэлж байсан тэнсэн харгалзах ялынхаа хугацааг дуусаагүй байхад хил давсан хэмээх үндэслэлээр Москвад онгоцноос буумагц нь цагдаа нар баривчилсан юм. Албаны эх сурвалжуудын мэдээлж байгаагаар, жагсаалд оролцож, баривчлагдсан хүмүүсийн дунд Навальныйн эхнэр Юлиа байгаа юм байна. Ямар ч эхнэр хүн нөхрөө суллуулахын тулд ард иргэдтэйгээ нэгдэх нь зүйн хэрэг билээ.