Монгол Улсын шадар сайд Ц.Оюунбаатар, ОБЕГ-ын дэд дарга Ц.Ганзориг нараар ахлуулсан ажлын хэсэг өнгөрсөн амралтын өдрүүдэд Өмнөговь аймагт ажиллаж, өвөлжилтийн байдалтай танилцсан байна.
Өмнөговь аймгийн хувьд есөн сум зудархуу байдалтай байгаагаас Хүрмэн, Булган, Сэврэй сумдад өвөлжилт хүндэрсэн байна. Тиймээс Улсын Онцгой комиссын даргын шийдвэрээр тус сумдад Өмнөговь аймгийн Улсын нөөцийн салбараас өвс хүргүүлэх цувааг хөдөлгөлөө.
Өвөлжилт хүндэрсэн аймаг сумдад 2011-2013 онд бүрдүүлсэн 6565 тонн өвсийг буцалтгүй тусламж болгон үнэгүй олгохоор болсон. Мөн 2678 тонн тэжээлийн үнийг 50 хувиар хямдруулан малчдад олгохоор болж, энэ бүх арга хэмжээний зардал болох нийт 2,6 тэрбум төгрөгийг Засгийн газрын нөөц сангаас гаргахаар шийдвэрлэсэн.