Увс аймгийн түүхт 90 жилийн ой өнөөдөр эхэлж, ирэх лхагва гарагт албан ёсны нээлтээ хийх юм. Нутгийнхан ойн хүрээнд нэлээд олон ажил зохион байгуулж, шинэхэн цэнгэлдэхээс гадна, Монголдоо хамгийн томд тооцогдох 9 метр өндөр морин хуурыг урлан байрлуулсан билээ. Үүгээр ч зогсохгүй нутгийнхаа ойн наадмыг зорин ирж буй зочид, төлөөлөгчдийг алд цэнхэр хадаг, мөнгөн аягатай сүүн мялаалгатай угтаж байгаа ажээ.
