УОК-оос Үндэсний их баяр наадмын талаар гаргасан шийдвэрээ танилцуулж байна.
ХЗДХ-ийн сайд Х.Нямбаатар “УОК баяр наадмыг хойшлуулах нь зүйтэй гэсэн санал гаргаж маргаашийн Засгийн газрын ээлжит бус хуралдаанаар эцэслэн шийдвэрлэнэ.” гэлээ.
Түүнчлэн “Нэгэнт хийсэн урлаг соёлын видео контентуудыг видео хэлбэрээр баярын өдрөөр цацахаар төлөвлөж байна” гэв.
Эрүүл мэндийн сайд С.Энхболд “Дельта вирустэй холбоотой хорио цээр, хариу арга хэмжээг улс орнууд чангатгаж байна. Япон улс руу 50 сорьцыг илгээсэн. Урьдчилсан дүнгээр 50 сорьцноос 5 сорьцонд Дельта вирус илэрсэн. Эдгээр хүмүүсийг бид тусгаарласан. Тархалт байхгүй. Манай улсад альфа хувилбар тархалттай байна” гэлээ.
УОК-ын хэвлэлийн төлөөлөгч Ц.Ганзориг “ЭМЯ эрсдэлийн үнэлгээг цаг тухайд нь хийсэн. Наадмыг өнжих, цуцлах, хойшлуулах, мөн гадаадаас ирж байгаа иргэдийг 14 хоног тусгаарлах асуудлыг хэлэлцсэн. Монголд Дельта хувилбар ороод ирсэн юм биш биз гэсэн асуудал яригдаж байна.
Өнөөдрийн судалгаа шинжилгээний дүнд Монголд альфа хувилбар байна. Дельта хувилбар байна гэж эцэслэж тогтоогдоогүй байна” гэв.