Хөвсгөл аймгийн Цагааннуур сумын иргэдийн төлөөллийг Монгол Улсын Хүний эрхийн Үндэсний Комиссын дарга, гишүүд авч уулзлаа. Монгол Улсын Хүний эрхийн Үндэсний Комиссын гишүүн П.Оюунчимэг тува иргэдийн эрхийн хэрэгжилтийн асуудлаар тэдний санал бодлыг сонсч, урьд өмнө нь хамтран хэрэгжүүлсэн ажил үйлс хэрхэн биеллээ олж байгаа болон үндэстний цөөнхийн эрхийн хэрэгжилтийн нөхцөл байдал хэр байгаа талаар санал солилцож нээлттэй ярилцлаа. Эдгээр иргэдийн төлөөлөл нь Хөвсгөлийн тайгаас нийслэлийг зорин ирж Монголын Хүнс, хөдөө аж ахуйн үндэсний ассоциацийн 8 дугаар зөвлөгөөнд оролцоод буцахдаа эртний танил П.Оюунчимэг гишүүнийг зорин ийн уулзахаар ирсэн байв. Тэдэнд хамтран ажиллах, шийдвэрлэх асуудлууд цөөн биш байгааг уулзалтын үеэр хөндөж ярилцлаа.
Тухайлбал, 2019 онд зохион байгуулах “2000 цааны баяр”-ыг тэмдэглэхийн сацуу тайгад аж төрж буй хүмүүсийн эрхийн асуудлыг олон нийтэд таниулах, цаа маллаж амин зуулгаа залгуулж ирсэн соёлыг хүндэтгэх, мөн цаатан иргэдийн ажилласан жилийг малчидтай адил тооцуулж, өндөр насны тэтгэвэр тогтоолгодог болгуулах, сум орон нутгийн удирдлагад үндэстний цөөнхийн төлөөллийг оруулах, Монгол Улсын Ерөнхийлөгчийн тува иргэдийн талаарх зарлигийн хэрэгжилт зэрэг сэдвээр ярилцлаа. Монгол Улс дахь үндэстний цөөнхийн нэг болох тува иргэн 470 гаруйхан байгаа бөгөөд тэдний амьжиргааны гол эх үүсвэр цаа бугын бэлчээрийн хүртээмж, баруун, зүүн тайгын газар нутгийн 96 хувь нь уул хад эзэлдэг тул 3-4 хувийг нь бэлчээрээр ашиглах боломжтой байдаг зэрэг нөхцөл байдлыг судалж үзэх шаардлагатай гэдгийг уулзалтын үеэр ярьж байлаа.
