Монголын дугуйн холбоо /МДХ/ анх удаа Франц улстай хамтран хагас мэргэжлийн буюу Continental team ‘PROJECT NICE COTE D’AZUR’ багийг байгуулаад байна.
Гурван жилийн хугацаатай байгуулагдсан энэ багт залуучуудын шилдэг тамирчид багтсан бөгөөд Францын мэргэжилтэн дасгалжуулагчаар ажиллах юм. Тэд “Токио 2020” олимпийн наадамд Монголын дугуйчид эрх авч оролцуулах зорилготой ажиллах юм. Тус багийн тамирчид удахгүй Европыг зорих бөгөөд бүрэлдэхүүнд нь Б.Идэрболд, Б.Буяндэлгэр, Д.Эрхэс, Э.Алтан-Очир, Н.Буянтогтох, С.Аюуш-Очир, К.Стефан, К.Брендан нарын найман дугуйчин багтжээ.
МДХ-ноос өчигдөр (2018.02.22) тамирчдын амжилт болоод “Токио 2020” олимпийн наадамд эрх аван оролцох бэлтгэл ажлын талаар мэдээлэхдээ энэхүү сайн мэдээг сонордуулсан юм.
Ази тивийн аварга шалгаруулах Засмал замын дугуйн тэмцээн Мьянмар улсад хоёрдугаар сарын 8-12-нд болж, манай баг тамирчид амжилттай оролцжээ. Багийн 70 км-ын уралдаанд Монголын баг шагналт IV байрт орсон бол “Under 23” ангиллын бөөн гараатай уралдаанд ОУХМ С.Жамбалжамц хүрэл медаль хүртжээ. Энэ амжилт нь тивийн АШТ-ий бөөн гараатай уралдаанаас авсан анхны медаль болж түүхэнд бичигдэж байна.