Өмнөговь аймаг байгуулагдсаны 87 жилийн ойн баяр наадам долдугаар сарын 5, 6-ны өдрүүдэд болно. Тус аймаг 87 жилийн ойн баяр наадмаараа эрлийз, хязаалан, шүдлэн, азарга, соёолон, даага, их насны морьдын уралдаан зохион байгуулах юм. Өнөөдөр эрлийз болон шүдлэн насны морьдын уралдаан болж байна.
Үүнтэй холбогдуулан тус аймгийн Гэр бүл, хүүхэд, залуучуудын хөгжлийн газраас хурдан морины уралдаанч хүүхдийг хурууны хээгээр цахим бүртгэлийн системд бүртгэх ажлыг зохион байгуулж байна.
Мөн энэ жилээс хурдан морины уралдаанч хүүхдүүдийг гэнэтийн ослын даатгалд нэг жилийн хугацаатай 100 мянган төгрөгөөр даатгуулах ажлыг эхлүүлж байгаа юм. Ингэснээр хурдан морины уралдаанч хүүхэд гэнэтийн осол, гэмтэлд өртсөн тохиолдолд 20 сая хүртэлх нөхөн олговор авах боломжтой болж байгаа юм.
Одоогийн байдлаар уяачид уралдаанч хүүхдээ 100 мянган төгрөгөөр гэнэтийн ослын даатгалд даатгуулахыг зөвшөөрч байгаа бөгөөд ямар нэгэн зөрчил, дутагдал гараагүй талаар тус аймгийн ГБХЗХГ-аас мэдээллээ.
Уралдаанч хүүхдийнхээ аюулгүй байдлыг хангаж, гарч болзошгүй эрсдэлээс хамгаалж гэнэтийн ослын даатгалд хамруулж байгаа Өмнөговь аймгийн нийт уяачиддаа талархал илэрхийлье.
