Энэ сарын 15-ны өдөр Увс аймгийн Биеийн тамир, спортын газрын 70 жилийн ой тохиожээ. Энэ хүрээнд тус аймгаас төрөн гарсан Монгол Улсын аваргуудын нэрэмжит “Увс нуур” цомын барилдаан гурван өдрийн турш тус аймгийн биеийн тамир спортын газрын зааланд болж өндөрлөсөн байна.
Энэ сарын 16, 17-ны өдрүүдэд хүчит 128 бөхийн барилдаанд хоёр давсан шилдэг 32 бөхийг Увс аймгаас төрөн гарсан Монгол Улсын аваргуудын нэрэмжит “Увс цом-2017” тойргийн барилдаанд шигшин оролцуулжээ.
Тойргийн барилдаанд түрүүлсэн бөхийг шилжин явах цом, 5000 ам.доллар, бөхийн дүрс бүхий алтадсан цом, алтан медаль, дурсгалын зүйлээр байлсан байна. Энэхүү барилдаанд Улсын арслан Н.Батсуурь үзүүрлэжээ. Мөн Улсын аварга С.Мөнхбат, аймгийн хурц арслан Н.Золбоо, Улсын заан Б.Соронзонболд, Аймгийн арслан Ц.Мөнхбаяр нар удаалсан байна.