Ерөнхийлөгчийн тангараг өргөх товыг тогтох тухай УИХ-ын тогтоолын төслийг хэлэлцлээ.
Шинэ Ерөнхийлөгчийг 2021 оны зургадугаар сарын 25-ны 11:40 цагт тангараг өргүүлэхийг чуулганы хуралдаанд оролцсон гишүүдийг олонхын саналаар дэмжив.
Шинээр сонгогдсон Ерөнхийлөгчийн бүрэн эрхийг хүлээн зөвшөөрөх тухай хуулийг батлах эсэхээр санал хураалт явууллаа.
Чуулганы танхимаас санал хураалтад оролцсон 14 гишүүнээс нь татгалзсан бол цахимаар оролцсон 49 гишүүнээс нэг нь татгалзав. Тодруулбал, цахимаар оролцсон Н.Алтанхуяг, танхимаас оролцсон Б.Пүрэвдорж нар эсэргүүцэв.
Ийнхүү санал хураалтад оролцсон нийт 63 гишүүний 61-ийнх саналаар Ерөнхийлөгчийн бүрэн эрхийг хүлээн зөвшөөрөх тухай хуулийг баталлаа.
УИХ-ын гишүүн Н.Алтанхуяг: Энэ удаа сонгууль болсонгүй. Маш муухай шившигтэй жүжиг болоод дууслаа. Сонгуулиар далимдуулж КОВИД гэдэг өвчнийг нэлээн даамжрууллаа. Тэгэхээр цар тахлыг иргэд биш дарга нар тараадаг гэдэг нь сая харагдлаа.
Сонгуулийг маш муу зохион байгууллаа. СЕХ-ны даргыг огцруулах хэрэгтэй.
Төсвийн мөнгийг гарын салаагаар урсгалаа. Гадаадаас зээл авч байгаад байгалийн баялгийн хувь мэтээр худал хэлж тараалаа. Энэ сонгууль үндсэндээ хяналтгүй боллоо.
Хар машин шатаагаад явж байсан нөхдүүд өнөөдөр хар машинаа тэврээд сууж байна. Ер нь Монгол Улс сонгуулиа хийж чадахаа байж.
УИХ-ын гишүүн Н.Энхболд: СЕХ-ны удирдлагын талаар хэлсэн зарим хүнтэй санал нийлэхгүй байна. Харин ч хариуцлагатай сайн ажилласан.
Сонгуулийн үеэр яригдаж байсан нэг нам, нэг хүний дарангуйлан тогтлоо гэдэг зүйлд тайлбар хиймээр байна. Өнөөгийн нийгэмд нэг хүний дарангуйлал тогтох боломжгүй. Ерөнхийлөгчийн эрх мэдэл, улс төр, гүйцэтгэх эрх мэдэлд оролцдог байсан нөлөөллийг Үндсэн хуулийн өөрчлөлтөөр хязгаарласан. Ингэж хязгаарлахыг У.Хүрэлсүх өөрөө намаа уриалж батлуулсан юм.