Өнөөдөртөө багтаж Засгийн газрын бүрэлдэхүүний тухай хуулийн төслийг өргөн барина. Шинээр эмхлэн байгуулагдах Засгийн газарт орох сонирхолтой олон хүн байгаа ч 18 сайдын нэр тодрох учиртай. Одоогийн байдлаар 10 гаруй сайдын нэр задраад байна.
Засгийн газрын хэрэг эрхлэх газрын дарга Я.Санжмятав, С.Баярцогт нарын нэр дуулдаж байна. Н.Алтанхуяг хийгээд Алтангадасын гишүүд Я.Санжмятавыг дэмжиж байгаа бол Ерөнхий сайд Ч.Сайханбилэг С.Баярцогтыгоо оруулж ирэхээр фракцийнхантайгаа үзээд эхэлсэн сурагтай. Уг нь С.Баярцогт өөрөө амбицлахгүй байгаа бөгөөд Ерөнхий сайд ихээхэн хүчтэй дэвшүүлж байгаа гэх. Харин Шадар сайдын суудалд Ч.Хүрэлбаатар, Байгаль орчны сайдаар Д.Оюунхорол ажиллахаар болжээ. Мөн Сангийн сайдад Ж.Эрдэнэбат гишүүн нэр дэвшиж байгаа бол МАН-ынхан Хөдөлмөрийн яам, Үйлдвэр, хөдөө аж ахуйн яаманд хэнийг нэр дэвшүүлэх нь тодорхойгүй байна. Хууль зүйн сайдаар Д.Дорлигжав, Уул уурхайн сайдаар Р.Жигжид, Г.Баярсайхан нарын нэг нь сонгогдох нь. МоАХ мөн Зам, тээврийн яамыг авч байгаа бөгөөд Х.Баттулга гишүүн имижээ хадгалж, А.Гансүхийгээ гаднаас дахин зүтгүүлж байгаа юм байх. Тэрчлэн АН-ын МҮДН фракцид Эрүүл мэнд, спортын яам, Батлан хамгаалын яамыг хуваарилсан бол тэд яамаа голж Аж үйлдвэрийн яамыг авахаар болжээ. МҮАН-ын дарга М.Энхсайхан Барилга, хот байгуулалтын яамыг тэргүүлэх бол МАХН-ынхан Эрчим хүчний яаманд хүнээ томилох аж. Харин Хүн амын хөгжил, нийгмийн хамгаалал, Боловсрол, соёл, шинжлэх ухааны сайд хуучнаараа ажиллах юм байна. Ингээд үлдсэн яамыг толгойлох сайд нарынхаа нэрсийг тодруулчихвал өргөн барихаар зэхэж байна.
Л.ТӨР