Үндэсний их баяр наадмын хөтөлбөрийг Наадмын комиссоос өчигдөр баталжээ. Тулгар төрийн 2225, Их Монгол Улсын 810, Ардын хувьсгалын 95 жилийн ойн баяр энэ жил тохионо. Олон тэгш ой тохиож байгаа тул энэ жил өмнөх жилүүдийнхээс илүү олон буюу 1024 бөх барилдан зургаан насны 200 морийг уралдуулахаар болжээ.
Цэнгэлдэх хүрээлэнд наадамлахаар ирсэн иргэдийн авто машинд зориулан нийт долоон давхар бүхий 500 машины зогсоолыг ашиглалтад оруулахаар болсон гэнэ. Хурд группээс барьж буй, Төв цэнгэлдэх хүрээлэнгийн зүүн хойд талд байрлалтай авто машины уг зогсоолын гадна тохижилтын ажил одоо үргэлжилж байна. “Дүнжингарав”, “Japan town” хотхоны гадна талбайг зогсоол болгон ашиглах юм.
Наадмын тасалбарыг ирэх сарын 6-наас эхлэн борлуулах бөгөөд нэг хүнд дөрвөөс илүү тасалбар худалдахгүй аж.