Архангай аймгийн Ихтамир сумын Эрдэнэтолгой багийн “Цагаан даваа” гэдэг газар М /5 настай, эрэгтэй/ төөрч алга болсон талаарх мэдээлэл өчигдөр 13.00 цагт тус аймгийн онцгой байдлын газарт иржээ. Таван настай хүү төөрч, сураггүй болсон тухай дуудлагын дагуу аймгийн Онцгой байдлын газрын есөн албан хаагч, эрэн хайх ажиллагааг зохион байгуулсан байна. Хүүг үдшийн 23 цагийн үед эсэн мэнд олж, ар гэрт нь хүргэж өгчээ.
Түүнчлэн хүүхэд төдийгүй томчууд ч бороонд зүг чигээ алдаж төөрөх, гол усанд осолдож эндэх тохиолдол олон гарч байгааг Онцгой байдлынхан анхааруулсаар байна. Энэс арын 25-ны өдөр Хөвсгөл аймгийн Бүрэнтогтох сумын Эрчим багийн “Хилэнтийн гүүр” гэдэг газар Дэлгэрмөрөнд иргэн М /42 настай, эрэгтэй/ живжээ. Хөвсгөл аймгийн Онцгой байдлын газрын зургаан албан хаагч голд живсэн хүнийг эрж хайсаар байгаа гэнэ. Тиймээс томоохон гол мөрөн, нуур цөөрөмд орохдоо анхаарал болгоомжтой байхыг онцгойлон сануулж байна.