Улсын хэмжээнд энэ оны эхний есөн сарын байдлаар 47,744 эх амаржиж, 48,084 хүүхэд төрүүлжээ.
Энэ нь өмнөх оны мөн үеэс амаржсан эх 6,771 (12.4%), төрсөн хүүхэд 6,812 (12.4%)-оор тус тус буурсан үзүүлэлт аж.
ҮСХ-ны Нийгмийн салбарын статистик үзүүлэлтүүдийг Хамтын ажиллагаа, тархаалтын хэлтсийн ахлах статистикч Д.Баасан “Төрсөн хүүхдийн тоо өмнөх оны мөн үеэс 12.4 хувиар буурсан. 1,000 хүнд ногдох төрөлт өмнөх оны мөн үеэс 2.2 нэгж хувиар буурсан үзүүлэлттэй гарлаа. 1,000 хүнд ногдох төрөлт Улаанбаатар хот болон Баян-Өлгий, Увс, Ховд, Орхон, Говьсүмбэр аймагт улсын дунджаас 0.1-3.9 нэгж хувиар дээгүүр, бусад аймагт 0.5-7.7 нэгж хувиар доогуур байна.
Нас баралт оны эхний есөн сарын байдлаар 13,353 болж, өмнөх оны мөн үеэс 541 (3.9%)-ээр буурсан бөгөөд 1,000 хүнд ногдох төрөлт 14, нас баралт 3.9, ердийн цэвэр өсөлт 10.1 байгаа” хэмээв.
Хүн амын ердийн цэвэр өсөлтийг төрөлт, нас баралтын зөрүүгээр тодорхойлдог.