Туркийн ерөнхийлөгч Рэжеп Тайип Эрдоганыг Султан шиг аашилж байна хэмээн олон нийт шүүмжлэв. Тэрээр саяхан Анкара хотын ойн бүсэд орших 614 сая ам.долларын өртөгтэй ордондоо нүүж оржээ. 1000 өрөөтэй, 3,1 сая фут квадрат талбайтай энэ харш нь Францын эзэн хааны ордноос дөрөв дахин том юм. Туркийн сангийн сайд Мехмет Симсек энэхүү ордон анх төлөвлөж байснаасаа хоёр дахин их зардлаар бүтсэн гэж мэдэгджээ. Ерөнхий сайдын албыг 11 жил хашиж байгаад ерөнхийлөгч болсон Эрдоган 184 сая ам.доллараар хувийн онгоц худалдаж авсан гэнэ.
