Өнгөрсөн баасан гаригт Туркэд болсон цэргийн эргэлт хийх оролдлогын талаархи мэдээллийг нэгэн баримт бичгээс олсон талаар “Анадолу” уламжилсан байна. Тус баримт бичиг Эгийн тэнгисийн армийн командлалын штабын дарга асан, хошууч генерал Мемдух Хакбиленд байсныг илрүүлжээ. Мемдух Хакбилен нь Измир боомтод цэргийн эргэлт хийхийг завдсан хэргээр баривчлагдаж, түүнд 27 хуудас бүхий “Тусгай үйлчилгээ” нэртэй баримт бичиг байсныг олсон гэж Туркийн Аюулаас хамгаалах хүчний ажилтан мэдэгдсэн байна.
Баримт бичигт дурдсанаар, долдугаар сарын 16-ны бямба гарийн 03:00 цагт бүх нисэх онгоцны буудал, боомт, гаалийн хяналтын цэгийг хяналтдаа оруулж, 06:00 цаг гэхэд улс орон даяар хөл хорио тогтоохоор төлөвлөжээ. Дээрх баримт бичгийг ажиллагаа амжилттай болсон тохиолдолд Туркийн Жанжин штабаас Агаар цэргийн хүчин, Хуурай замын хүчин, Тэнгисийн цэргийн хүчин болон Эргийн хамгаалалтын цэргийн командлал руу илгээх байсан аж.