Түрээсийн орон сууцны цахим бүртгэлийг 14 хоногийн хугацаанд 24 цагийн турш амралтын өдрүүдээр нээлттэй явуулах юм. Иргэд наймдугаар сарын 5-ны дотор хэзээ ч бүртгүүлэх боломжтой гэдгийг албаныхан хэлж байгаа юм.
Одоогийн байдлаар иргэд найман ангиллаас хувийн байгууллагад ажиллагсад болон төрийн албан хаагч, тэтгэвэр тогтоолгосон өндөр настаны ангилалд олноор бүртгүүлээд байгаа юм байна. Мөн зарим ахмад настай хүмүүс “Миний эргэн тойронд компьютер мэдэх хүн байхгүй. Хүүхэд амралтаараа хөдөө явсан байна. Та нар бүртгүүлээд өгөөч” гэж хандах асуудал их байгаа аж. Харин нийслэлийн орон сууцны корпорацийн зүгээс цахим бүртгэл хийж өгөх нь хориотой байдаг учир бүртгэл хийхгүй гэдгийг анхааруулж байгаа аж. Түүнчлэн зарим иргэдийн гар утсанд “Түрээсийн орон сууцанд тэнцсэн” гэсэн мэдээлэл ирж байна гэх мэдээлэл иргэдийн дунд тархаад байгаа юм. Тэгвэл энэ мэдээлэл худал. Наймдугаар сарын 5-ны өдрийг хүртэл бүх иргэдийн мэдээллийг хүлээн авна. Үүний дараагаар бүх иргэдийн хувийн мэдээллийг нийслэлийн Орон сууцны сонгон шалгаруулах тусгай комисс нягталж, шалгаад сонгон шалгаруулна. Цахим бүртгэл дуусаагүй байхад иргэдийг сонгон шалгаруулах ямар ч боломжгүй гэдгийг холбогдох ажилтнууд мэдээллээ.
Б.ОЮУНЖАРГАЛ