Хөдөө орон нутагт зорчих хэсгийн хөдөлгөөнийг зарим хэсэгт хязгаарлаад байгаа билээ. Үүнтэй холбогдуулан Тээврийн цагдаагийн албанаас мэдээлэл хийлээ.
ТЦА-ны Урьдчилан сэргийлэх хэлтсийн ахлах мэргэжилтэн, цагдаагийн хошууч Б.Лхагважаргал:
“Өнгөрсөн амралтын өдрүүдээр орсон усархаг борооны улмаас Улаанбаатар хотоос 117 км зайд орших Төв аймгийн Лүн сумын Баянхангайн нутагт орох, гарах хөдөлгөөнийг түр хугацаагаар хязгаарласан байгаа.
Өнөөдөр орой буюу зургаадугаар сарын 17-ны18:00 цаг гэхэд хэвийн үйл ажиллагаанд нь оруулна гэж байгаа боловч энэ хугацааг сунгаж магадгүй нөхцөл байдалтай байна.
Мөн Төв аймгийн нутаг, Дундговь аймгийн Мандалговь сум руу явах замын 70 км-т зорчих хэсгийн нэг эгнээ нь бүхэлдээ усанд автаж, Төв аймгийн цагдаагийн алба хаагчид газар дээр нь ажиллаж байна.
Зөвхөн эдгээр чиглэлийн замууд ч гэлтгүй хөдөө орон нутгийн бусад чиглэлийн зам эвдэрч хөрс нь суларч, зам тээврийн осол гарах аюултай болсон байгаа. Тийм учраас зам тээврийн хөдөлгөөнд оролцохдоо анхаарал болгоомжтой байж хурдаа тохируулж явах шаардлагатай байна.
Өчигдөр Төв аймгийн Баянхангай сумаас Улаанбаатар хот руу чиглэлтэй зам дээр Toyota Land cruiser 100 маркийн авто машин онхолдож таван хүн газар дээрээ нас барж, нэг хүн хүнд гэмтсэн ноцтой осол гарсан.Хэрэг мөрдөн байцаах шатандаа явж байгаа. Тиймээс иргэд маань замын хаасан байгаа хэсгүүдэд зорчихдообатлагдаагүй шороон замаар битгий яваачээ гэж хэлмээр байна” гэлээ.
Г.БУЯНХИШИГ