Шинэ жилийг “Цөмөөхэй”-гүйгээр төсөөлөхийн аргагүй билээ. Жил бүрийн арванхоёрдугаар сард Улсын Дуурь, бүжгийн эрдмийн театрт дэлхийн алдарт П.И.Чайковскийн “Цөмөөхэй” бүжгэн жүжиг тоглогддог уламжлал тогтоод таван жил болж байна.
“Монголын балетын хөгжил” сан дэлхийн алдарт “Цөмөөхэй” балетыг Улаанбаатар хотноо тоглож байна.Дэлхийн 5 тивийн улсад зэрэг тоглогддог энэхүү алдарт бүжгэн жүжгийг Монгол Улсын Гавъяат Жүжигчин Д.Алтанхуягийн найруулгаар энэ сарын 22-23-нд Дуурь, бүжгийн эрдмийн театрт тоглож байна. Тодруулбал өнөөдөр ДБЭТ-т 12.00, 17.00 цагаас “Цөмөөхэй” бүжгэн жүжгийг хүүхэд багачуудад толилуулах нь ээ.
Дуурь, бүжгийн эрдмийн театрын үүдний танхимд “Цөмөөхэй”-г үзэхээр зорин ирсэн үзэгчиддээ зориулан гэрэл зургаа татуулах орчинг бий болгон засчээ.
Таван жилийн өмнө анх удаа тус тоглолтын тайз, декорац, хувцас хэрэглэлийг АНУ-ын “Бостон балет” компаниас худалдан авч, цоо шинэ найруулгаар нийслэлийн үзэгчдэд хүргэж эхэлсэн. Алдарт “Цөмөөхэй” балетад тоглох бяцхан бүжигчдээр монгол хүүхдүүдийг шалгаруулдаг уламжлал тогтсон билээ.
“Цөмөөхэй” балетын түүхээс дурдвал, Германы нэгэн жижигхэн хотхонд илбэчин Просселмейр хүүхдүүдэд илбэ үзүүлэн гайхшруулж байгаагаар эхлэх энэ балет дэлхийн олон хүүхдүүдийг балетын урлагт хөтөлж, анхных нь балетын дүр бүтээсэн бүжгэн жүжиг байсан юм. Тэртээ 1892 онд анх тайзнаа амилж байсан бол өнөөдрийг хүртэл 120 жилийн түүхэн хугацаанд тив алхсан тархсаар шинэ оны баяраар үзэх ёстой нэгэн гэр бүлийн уламжлал болтлоо үзэгчдэд хүрч чадсан сонгодог балет болжээ.