Үндсэн хуулийн Цэцийн Их суудлын хуралдаан өнөөдөр 09:30 цагт эхэлсэн бөгөөд хуралдаанаар Ерөнхийлөгч У.Хүрэлсүхийн Шүүхийн тухай хуульд гаргасан гомдлоо татах саналыг хэлэлцэж байна.
Тодруулбал экс Ерөнхийлөгч Х.Баттулга Шүүхийн тухай хуулийн зарим зүйл заалт Үндсэн хууль зөрчсөн байна гэж үзэж Үндсэн хуулийн цэцэд гомдол гаргасан билээ. Энэ дагуу Үндсэн хуулийн Цэц маргаан үүсгэж, Дунд суудлын хуралдаанаараа Шүүхийн тухай хуулийн зарим зүйл заалт Үндсэн хууль зөрчиж байна гэж үзсэн шийдвэр гаргасан байдаг.
Тэгвэл шинээр сонгогдсон Ерөнхийлөгч У.Хүрэлсүх дээрх гомдлоос бүхэлдээ татгалзаж, буцаан татсан. Энэ асуудалтай холбогдуулан Үндсэн хуулийн Цэцийн Их суудлын хуралдаан өнөөдөр болж байна.
УИХ-ыг төлөөлж Б.Энхбаяр гишүүн оролцож буй. Тэрбээр өөрийн цахим хуудаснаа “Шүүхийн шинэтгэл Үндсэн хуулийн босго давах эсэх асуудал Цэцийн Их суудлын хуралдаанаар эцэслэгдэн шийдвэрлэгдэх өдөр. Хуулийн хулгай, хонгилын бүтэц, шударга ёс хуулиар л залруулагддаг байх нь бидний зорилго, Үндсэн хуульт ёсны зарчим. Энэ үйл хэрэгт цэг гэж байхгүй” гэж бичжээ.