Монгол Улсын спортын мастер Паламын Балдангийн нэрэмжит өсвөрийн цаначдын 2019 оны улсын аварга шалгаруулах тэмцээн Хэнтий аймгийн Дадал суманд болжээ. Уг тэмцээнд 13 аймаг, хотын 128 тамирчин сонгомол, тэших техникээр, хөгжөөнт буухиа гэсэн гурван төрлөөр дөрвөн насны ангилалд хурд хүч авхаалж самбаагаа сорин өрсөлдсөн байна.
Багийн дүнгээр Булган аймгийн баг тамирчид алт, Төв аймгийн баг тамирчид мөнгө, Орхон аймгийн баг тамирчид хүрэл медаль хүртэв.
Тэмцээний нээлтийн үйл ажиллагаанд Их эзэн Чингис хааны хөшөөний өмнө зохион байгуулсан бөгөөд нээлтийн арга хэмжээнд Хэнтий аймгийн Засаг даргын орлогч Г.Хэрлэнчулуун, БТСГ-ын дарга Г. Нэргүйбаатар нар оролцож цанын спортоор амжилт гаргасан зарим тамирчид болон улсын аварга шалгаруулах тэмцээнийг зохион байгуулахад хамтран ажилласан, ивээн тэтгэсэн албан байгууллага, аж ахуйн нэгж, иргэдийг шагнажээ. Мөн Хэнтий аймгийн БТСГ-аас Дадал сумын ЗДТГ-т 2018 оны аймгийн Спортын салбарын “ Шилдэг менежменттэй сум”-ын шагнал, цомыг гардуулсан байна.