УИХ-ын чуулганы нэгдсэн хуралдаан үргэлжилж байна. Хэлэлцэх асуудалтай холбогдуулан гишүүд санал хэллээ. Тухайлбал, УИХ-ын дэд дарга Ц.Нямдорж:
-УИХ-ын шийдвэр, Засгийн газрын шийдвэрийг шүүхэд өгч болдоггүй юм. Байдал ийм байсаар байтал захиалагч шүүгч нар нь түдгэлзүүлсэн шийдвэр гаргаж байна. Дээд шүүхийн чин Захиргааны хэлтсийн танхимын шүүгч нь ХХБ-нд ажиллаж байсан Батсуурь гэж хүн бий. Гэрлийн хурдаар Дээд шүүхийн танхимын тэргүүн шүүгч болсон. УИХ, Засгийн газрын шийдвэрийг замд нь алан хядах ажиллагаа явуулаад байвал шүүх байгаад хэрэггүй. Д.Дамба-Очир гишүүн Эрдэнэтийн үйлдвэрийг хэлэлцэхийг хэлсний төлөө хэвлэлээр доромжлуулж байна.
Дээр нь Тусгай хяналтын дэд хороог хуралдуулж өгөөч. УИХ-ын дарга чиглэл өгөөд сар болсон ч дэд хорооны гишүүд хуралдахгүй зугатаад байна. Ингээд байвал яаж явах вэ? Монголын хууль хяналтын байгууллага төрийн хяналтын дээр гарах юм бол яах вэ? Хүний эрхийн дэд хорооны дарга аймхай нөхөр зугатаад яваад байх юм. Буруу тийшээ хараад хүний эрх яриад суугаад байна хэмээлээ. УИХ-ын гишүүн Д.Дамба-Очир:
-Эрдэнэт үйлдвэрийн асуудал өнөөдөр шүүхийн шийдвэр дээр гацсан. Үйлдвэрийн ажиллагаа хэвийн бус байна. УИХ-ын тогтоолын шийдвэрийг хэрэгжүүлээч гэж шаардсаныхаа төлөө би хэвлэл мэдээллээр элдэв янзаар цоллуулж байна. Элдвээр доромжлуулж байна. Энэ хэрэгжилтийн асуудлыг чуулганы хуралдаанаар хэлэлцүүлж өгөхийг УИХ-ын даргаас хүсч байна гэлээ. УИХ-ын дарга М.Энхболд “Энэ асуудлыг өнөөдрийн хуралдаанд оруулах боломжгүй. Цаашдаа хэлэлцэж байгаад оруулах шаардлагатай гэвэл оруулъя” гэлээ.
Ингээд Үндсэн хуулийн цэцийн дүгнэлтийг хэлэлцэж эхэллээ. Шүүгчийн эрхзүйн байдлын тухай хуулийн зарим заалт Үндсэн хуулийн холбогдох заалтыг зөрчсөн эсэх маргааныг ҮХЦ хянан хэлэлцсэн байна.