БНХАУ-ын Бээжин хотноо болж байгаа буудлага спортын Дэлхийн цомын цуврал тэмцээний хийн гар бууны 10 метрийн дасгалд спортын мастер Цолмонбаатарын Анударь 578 оноогоор Монгол Улсын рекордыг шинэчлэн тогтоож, ОУХМ цолны болзол ханган, “Токио-2020” зуны олимпын наадамд оролцох эрх авлаа.
Монголын баг тамирчдаас “Токио-2020” олимпын наадамд оролцох анхны эрхийг ийнхүү Ц.Анударь авч байгаа аж. Тэрбээр 1997 онд төрсөн, 22 настай бөгөөд өсвөрийн болон залуучуудын ангилалд олон улсын тэмцээнд оролцож амжилт нь ахисаар 2017 оноос эхлэн насанд хүрэгчдийн тэмцээнд оролцох болжээ.
Ц.Анударь энэ удаагийн “Дэлхийн цом”-ын цуврал тэмцээний хийн гар бууны дасгалд зургадугаар байрт шалгарсан боловч түүний өмнөх нэгээс дөрөвдүгээр байрыг эзэлсэн тамирчид Токиогийн олимпын эрхээ авчихсан учраас Токиог зорих эрхтэй болжээ. “Дэлхийн цом”-ын тэмцээн энэ сарын 28-нд өндөрлөнө.