“Шинэ үе” продакшны жүжигчин Ц.Алдармаа, Д.Оюунтуул нарт холбогдох хэргийн шүүх хурал өчигдөр Дүүргийн эрүүгийн хэргийн анхан шатны хоёрдугаар шүүхэд боллоо. Эл хурал хоёр удаа хойшлоод байсан юм.
Хэргийг сануулахад өнгөрсөн хавар тус хамтлагийнхан Эрдэнэт хотод тоглолтоор явж байхад Д.Оюунтуул, Ц.Алдармаа нар муудалцан бие бие рүүгээ буцалсан ус цацсан байдаг. Д.Оюунтуул цээж, хүзүү, хуруундаа ихээхэн хэмжээний түлэгдэлттэй “Мөнгөн гүүр” эмнэлэгт хүргэгдэн ирсэн бол Ц.Алдармаа “Би бас хохирсон. Д.Оюунтуул эхлээд над руу аягатай халуун ус цацсан” хэмээн ойр дотнынхондоо ярьсан байдаг. Жүжигчин бүсгүйчүүдийн муудалцсан шалтгааныг тухайн үед янз бүрээр тайлбарлаж байсан юм. Г.Ундармаа ажлаасаа түр чөлөө авч, тоглодог дүрүүдээ Д.Оюунтуул руу шилжүүлсэн нь Г.Алдармаад таалагдаагүй. Үүнээс болж муудалцсан гэж таамаглаж байсан билээ. Гэтэл тэдний ойр дотнын нэгэн “Хоёр бүсгүй хувийн асуудлаас болж муудалцсан. Нэг залуугаас болсон юм шиг байна лээ” хэмээн ам алдсан байдаг.
“Шинэ үе” продакшны захирал, жүжигчин Бооёо буюу Б.Ариунболд “Тоглолтын дараа, ажлын бус цагаар ийм юм болсон. Тийм болохоор энэ асуудал манай хамтлагт хамаагүй. Бүсгүйчүүдийг хамтлагаасаа хасах эсэхийг бид хэлэлцэх болно” гэж тухайн үед мэдэгдэж байсан юм.
Д.Оюунтуулын өмгөөлөгч “Миний үйлчлүүлэгч өнгөрөгч дөрөвдүгээр сарын 28-наас хойш эмнэлгээр явж байгаа. Тэрнээс хойш ямар нэгэн ажил хөдөлмөр эрхлээгүй. Одоо ч эмнэлэгт хэвтэн эмчлүүлж байна. Ц.Алдармаагийн эмчилгээ, хохирлын төлбөр болох нэг сая 750 мянган төгрөгийг бэлнээр авчирсан. Энэхүү хуралд үйлчлүүлэгчийнхээ ялыг хөнгөрүүлэх саналтайгаар оролцоно” гэж ярьсан. Харин Ц.Алдармаагийн өмгөөлөгч “Хэргийг нэмэлт мөрдөн байцаалтад буцаалгах саналтай байна. Эл хүсэлтээ прокурорын байгууллагад удаа дараа тавьсан. Хэргийг хэлэлцэх явцад тэдний маргалдсан шалтгаан болон цөөнгүй хүний нэр хүнд, тэдний хувийн нууцын асуудлыг хэлэлцэх учраас хэргийг хаалттай хэлэлцүүлэх хүсэлтэй байна” гэсэн юм. Шүүх бүрэлдэхүүн хүсэлтийг хүлээн авч хурлыг хаалттай хэлэлцэхээр болсон.
Д.Оюунтуулд Эрүүгийн хуулийн 99.1-д зааснаар эрүүгийн хэрэг үүсгэн, яллах дүгнэлт үйлдээд байсан юм. Уг зүйл ангид “Бусдын бие махбодид хөнгөн гэмтэл санаатай учруулсан, өөрөөр хэлбэл эрүүл мэндийг нь түр хугацаагаар сарниулсан буюу хөдөлмөрийн чадварыг бага хэмжээгээр алдагдуулсан бол хөдөлмөрийн хөлсний доод хэмжээг таваас хорь дахин нэмэгдүүлсэнтэй тэнцэх хэмжээний төгрөгөөр торгох, эсхүл нэгээс гурван сар хүртэл хугацаагаар баривчлах ял шийтгэнэ” хэмээн заажээ. Харин шүүгдэгч Ц.Алдармааг Эрүүгийн хуулийн 96.2.6-д зааснаар “Бусдын бие махбодид хүнд гэмтэл санаатай учруулсан, өөрөөр хэлбэл амь биед нь аюултай гэмтэл учруулсан буюу хараа, сонсголгүй болгосон, эрхтнээс нь хагацуулсан, ажиллагаагүй болгосон, нүүрийг засаршгүй эвдэж дүрсийг алдагдуулсан, хүүхэд дутуу гаргуулсан буюу ураг зулбуулсан, сэтгэцийн өвчтэй болгосон, түүнчлэн хөдөлмөрийн чадварыг бүрмөсөн алдагдуулсан бол таваас дээш долоон жил хүртэл хугацаагаар хорих ял шийтгэнэ” буруутгаад байсан юм.
Өдрийн 13.30 минутад эхэлсэн шүүх хурал орой 19.15 минутын үед шийдвэрээ гаргаж, Ц.Алдармаад долоон жил хохирох ял, Д.Оюунтуулд хөдөлмөрийн хөлсний доод хэмжээг арав дахин нэмэгдүүлсэнтэй тэнцэх хэмжээний төгрөгөөр торгох ял тус тус оноолоо.
Ц.Алдармаагийн ар гэрийнхэн шүүхийн шийдвэрийг эсэргүүцэж “Манай охин ч хохирсон. Шүүх шударга байх ёстой” хэмээцгээсэн бол өмгөөлөгч нь давж заалдана гэдгээ мэдэгдсэн юм.
Д.САРУУЛ