Монголын загварын ертөнцийн сайхан бүсгүйчүүдийн нэг мисс, топ модель Х.Бадамгэрэл нэлээд хэдэн сарын өмнө Арабын нэгдсэн Эмират улсын Дубай хотноо зохион байгуулагдсан загварын долоо хоногт амжилттай оролцоод ирсэн. Дэлхийн шилдэг загвар зохион бүтээгчид чуулсан энэхүү шоуны үеэр зохион байгуулагчид нь Х.Бадамгэрэлийн ур чадварыг ихээхэн онцолж байсан бөгөөд түүний ковер зургийг сурталчилгааныхаа нүүр царай болгосон гэдэг.
Тэгвэл өдгөө тус шоунд дахин оролцохоор болсон тухайгаа топ модель Х.Бадамгэрэл цахим хуудсандаа “За нэг мэдээтэй. Дубай руу эргээп явахаар боллоо. Дубай болон тэр бүсдээ хамгийн том гэж тооцогддог “Fashion Forward in Dubai Fall Winter Fashion Week”-д уригдан оролцохоор боллоо. Түрүүчийн удаа намайг тэнд байхад сураглаж, эх орондоо ирсэн хойно албан ёсны санал болон урилгаа Монголын үндэсний дизайнерүүдийн холбооны тэргүүн Одонгэрэл эгчид минь явуулсан юм. Зардал нь шийдэгдээгүй болохоор тодорхой шийдэлд хүрээгүй байлаа. Тэгсэн бүх зардалын маань даахаар боллоо. Ингээд Дубайд дараагийн бүр ч том арга хэмжээ хүлээж байна. Дубайд байгаа Монголчуудаа энэ шоуг үзээсэй гэж чин сэтгэлээсээ хүсч байна ” хэмээн өөрийн цахим хуудсаар дамжуулан мэдээлсэн байна. Уг шоу гуравдугаар сарын 31, дөрөвдүгээр сарын 1, 2-ны өдрүүдэд болжээ.