Эдийн засгийн хямралыг умартаад, цэнгэлдэх хүрээлэндээ хөрөнгө оруулах хэрэгтэй болжээ. Дэнж хотойтол нааддаг монголчуудад 13000 хүнд л хүртдэг наадмын тасалбарыг олж авах нь тэнгэрээс од шүүрэхтэй адил шахуу юм болж байна. Найрсаг Улаанбаатар хэмээн сурталчилж байгаа ч наадмаараа бид умгар цэнгэлдэх хүрээлэндээ багтаж ядан, бие биенээ бүү хэл гадна дотнын зочдоо хүртэл хажиглахад хүрэв. Дэлхийд ганцхан монгол наадмыг сонирхохоор ирсэн жуулчдад “Үгүй” гэж хэлэх ч ёсонд хазгай. Монголыг зорин ирдэг жуулчдын хувьд “Монгол наадам” гэдэг аяллын брэнд үзмэр болох нь судалгаагаар тогтоогдсон. Гэтэл жуулчны компаниуд жилдээ ганц болдог наадмыг маань сонирхохыг хүссэн зочдодоо “Тасалбар олдохгүй нь” гэж халаглан хэлэхэд хүрдэг. Нийслэлийн хүн ам сая хол гарчихсан. Орон нутгийн иргэд маань ч нийслэлдээ наадам үзэх эрхтэй. Ингэхээр томхон багтаамжтай, орчин үеийн цэнгэлдэх хүрээлэн байгуулах гэдэг үндэсний хэмжээний бүтээн байгуулалт юм. Аялал жуулчлалд оруулж буй даацтай хөрөнгө оруулалт байх нь ч дамжиггүй.
Наадам ямар нэг удаа болоод өнгөрөх биш. Жил бүрийн наадмаар цэнгэлдэх хүрээлэндээ багталцахгүй бухимдаж суумааргүй байна. Бүхэл бүтэн улс байна даа. Наадмаараа ядаж хүмүүсийнхээ сэтгэл санааг сэв хийтэл өргөчих цэнгэлдэхтэй болмоор юм. Сая гаруй хүнтэй хотод багтаамж сайтай цэнгэлдэх хүрээлэн зөвхөн наадмаар ч бус бусад томоохон арга хэмжээнүүдэд ч ашиглагдаж л таарна. Гэхдээ ганц цэнгэлдэх хүрээлэнг уг нь ашиг харалгүйгээр улс нь аваад явчихаж болмоор л юм даа.