Токиогийн олимпод Монголын баг тамирчид хэрхэн оролцож, ямар амжилт гаргасныг тоймлон хүргэж байна
Зуны XXXII олимпийн их наадам Токио хотноо долдугаар сарын 21-ээс наймдугаар сарын 8-ны хооронд амжилттай болж өндөрлөлөө.
Токиогийн Олимпийн наадам Монголын багийн хувьд олон зүйлээр онцгой болж өнгөрлөө.
Ингээд Токиогийн олимпод Монголын баг тамирчид хэрхэн оролцсон талаарх онцгой содон баримтуудаас хүргэе.
Манай улс нэг мөнгө, гурван хүрэл медальтайгаар багийн дүнгээр 71-д бичигдлээ.
– Монголчууд энэ олимпод спортын 10 төрөлд 43 тамирчинтай оролцлоо. Энэ нь Монголын шигшээ багийн хувьд түүхэнд анх удаа хамгийн олон төрөлдөө хамгийн олон тамирчинтай оролцож буй хэрэг болсон юм.
Мөн ширээний теннис, 3х3 сагсан бөмбөгийн багийн төрлөөр анх удаа олимпод оролцлоо.
Гурван жилийн дараа болох Парисын олимпод Монголчууд түүхэн дэх хамгийн том бүрэлдэхүүнтэй оролцох боломжтой байгаа юм.
– Түүхэнд анх удаа Монголын шигшээ багийн эмэгтэй тамирчид багийн бүрэлдэхүүний дийлэнхийг бүрдүүллээ. Тухайлбал, 43 тамирчны бараг 60 хувь буюу 25 нь эмэгтэйчүүд байв. Өмнө нь Бээжингийн олимпод хүйсийн харьцаа тэгш буюу 14 эрэгтэй, 14 эмэгтэй тамирчин оролцсон бөгөөд бусад олимпод эрэгтэй багийг гишүүд давамгайлж олимпод оролцдог байлаа.
Мөн анх удаа эмэгтэй тамирчин нээлтийн ёслолд Монголын багийн тугийг заллаа. Сагсан бөмбөгийн тамирчин О.Хулан анхдагч болж түүхэнд тэмдэглэгдэв.
“Токио-2020” зуны олимп, паралимпийн наадамд оролцох Монгол Улсын багийн ёслолын болон спортын хувцасны загвар шалгаруулах уралдаанд “Michel&Amazonka” брэнд тэргүүн байр эзэлсэн юм. Ингэснээрээ 2019 онд БШУЯ-наас “Michel&Amazonka” брэндэд “Токио-2020” олимпийн наадамд оролцох Монголын баг тамирчдын хувцсыг бэлтгэх эрхийг олгосон билээ.
Баг тамирчдын өмсөх нийт 13 төрлийн хувцас байсан бөгөөд тэдний наймыг нь “Michel&Amazonka”, үлдсэн тавыг нь Японы алдарт “Mizuno” спорт брэнд хариуцан ажилласан. Олимп зохион байгуулагч орны иргэд Монгол Улсын баг тамирчдын хувцсыг хамгийн загварлаг, ганган болсон талаар сошиал орчиндоо мэдээлж, сэтгэгдлээ хуваалцсаар байв.
– Монголын 43 тамирчны 16 нь олимпод оролцож үзсэн туршлагатай бол 27 нь олимпийн дэвжээнд анхлан гарсан юм.
– Жүдочид хамгийн том буюу 12 тамирчны бүрэлдэхүүнтэй оролцож, түүхэндээ хамгийн олон буюу гурван медалийг хүртлээ. Мөн чөлөөтөөр нэг медаль авсан юм.
“Токио-2020” олимпийн наадмын жүдо бөхийн тэмцээний эмэгтэйчүүдийн 48 кг-д М.Уранцэцэг хүчээ сорьж олимпийн хүрэл медалийн төлөөх барилдаанд Португалийн Катарина Костатай хүч үзэн, өчих мэхээр цэвэр ялж хүрэл медаль хүртсэн билээ.
Жүдо бөхөөр гаргасан амжилтаараа Гиннесийн номонд бичигдсэн Монгол Улсын Хөдөлмөрийн баатар, гавьяат тамирчин, дэлхийн аварга Мөнхбатын Уранцэцэг Токиогийн олимпийн хүрэл медаль хүртэж, Монголын баг тамирчдын медалийн салхийг хагалсан гайхалтай амжилт үзүүлсэн юм.
– Монгол Улс анх удаа легионер тамирчинтай олимпийн наадамд оролцов.
Монголын иргэн болсон иран бөх Сайед Моллай зүгээр ч нэг оролцох бус, мөнгөн медаль хүртэж, Монголын спортын түүхэнд шинэ хуудас нээсэн юм.
Тэрбээр жүдо бөхийн -81 килограмм жинд барилдаж, шөвгийн дөрөвт Австри Улсын жүдоч Борчашвили Шамилыг цэвэр ялан олимпийн аваргын төлөө Японы жүдоч Таканори Нагасетай барилдан ялагдаж олимпийн мөнгөн медаль хүртсэн билээ. Ийнхүү Токиогийн олимпийн анхны мөнгөн медалийг тэр авчирсан.
“Токио-2020” Эрэгтэйчүүдийн 73 кг-д барилдаж ОУХМ Ц.Цогтбаатар Канадын Артур Маргелидоныг ялж олимпийн наадмын хүрэл медалийн эзэн болсон.
Токиогийн олимп дахь Монголын багийн хоёр дахь медалийг авчирсан.
“Токио-2020” чөлөөт бөхийн эмэгтэйчүүдийн 53 кг-д ДАШТ-ий хүрэл медальт, ОУХМ Б.Болортуяа хүрэл медалийн төлөө Камеруний бөх Жозеф Эссомбетой барилдан ялж, олимпийн хүрэл медальтан болсон билээ. Ингэснээр Монголын чөлөөт бөхийн спортын түүхэнд олимпоос медаль хүртсэн хоёр дахь эмэгтэй тамирчин болсон бөгөөд Токиогийн олимпийн дөрөв дэх медалийг авчирсан юм.
– Жүдоч М.Уранцэцэг, чөлөөтийн Б.Болортуяа нар олимп, дэлхийн хос медальтай 18, 19 дэх тамирчид болов. Өмнө нь Ж.Мөнхбат, Д.Сэрээтэр, Х.Баянмөнх, З.Ойдов, Д.Оюунболд, Д.Мөнхбаяр, Х.Цагаанбаатар, Н.Түвшинбаяр, Э.Бадар-Ууган, О.Гүндэгмаа, П.Сэрдамба, Н.Төгсцогт, С.Ням-Очир, С.Батцэцэг, У.Мөнх-Эрдэнэ, Д.Сумъяа, Д.Отгондалай гэсэн 17 тамирчин л энэ амжилтад хүрч байжээ.
– Монголын тамирчид дөрвөн медаль хүртсэнээс гадна өөр зургаан хүн медалийн төлөө өрсөлдөв.
Тэд бол боксчин Э.Цэндбаатар, хүндийг өргөлтийн М.Анхцэцэг, чөлөөт бөхийн М.Лхагвагэрэл, Ц.Намуунцэцэг, Б.Хонгорзул, С.Батцэцэг нар. Тэдний аль нэг нь л дахин ганц ялалт байгуулсан бол медалийн тоо нэмэгдэх байв. Нэг дор ийм олон тамирчин медалийн төлөө өрсөлдсөн тохиолдол Монголын олимпийн түүхэнд байсангүй.
– Монголын тамирчид чөлөөт бөх, жүдо, бокс, буудлага гэсэн дөрвөн төрлөөр олимпийн наадмаас медаль хүртэж байв. Хэрэв М.Анхцэцэг сүүлийн захиалгаа өргөсөн бол хүндийг өргөлт олимпийн медальт спорт болох байлаа.
– Энэ олимпийг Монголын таван шүүгч дэнсэлсэн нь мөн л түүхэн дэх анхны тохиолдол. Тэд бол жүдогийн шүүгч Т.Энхцэцэг, байт харвааны шүүгч Э.Саруул, хүндийг өргөлтийн шүүгч Л.Одгэрэл, боксын шүүгч Ц.Цогтгэрэл, О.Мандахбаяр нар юм.
Монголчууд өмнө нь олимпийн наадамд эмэгтэй шүүгчтэй оролцож байгаагүй. Харин энэ олимпийг дэнсэлсэн таван шүүгчийн дөрөв нь эмэгтэй байж, түүхийн шинэ хуудас нээв.
– Монголын чөлөөтийнхөн хамгийн хүнд жинд анх удаа олимпийн наадмын медалийн төлөө барилдлаа. Шинэ түүх бичиж, шинэ итгэл найдвар төрүүлсэн М.Лхагвагэрэл хаалтын ёслолд Монголын багийн тугийг залах хүндтэй үүргийг хүлээгээд байна.
– Монголчууд 2008 оноос хойш анх удаа ОУОХ-ны гишүүнтэйгээр олимпийн наадамд оролцов. МҮОХ-ны Тэргүүн дэд ерөнхийлөгч, Монголын багийн ахлагч Б.Баттүшиг 2020 онд ОУОХ-ны гишүүн болсон бөгөөд “Токио-2020” түүний ОУОХ-ны гишүүний хувиар оролцсон анхны олимп байв. Тэрбээр Монголын багийн сүүлийн медалийн эзэн Б.Болортуяад медалийг нь гардуулан өгсөн юм.
Н.ЦОГЗОЛМАА
