Монголын тэшүүрийн холбооны нэрэмжит шилжин явах цомын аварга шалгаруулах тэмцээнийг өнөөдөр Хандгайтын мөсөн гулгуурийн талбайд эхэлсэн юм. Тус тэмцээнд аймгуудын Биеийн тамир, спортын газар болон сум, дүүргийн спортын холбоод бие даан оролцож байна.
Цомын тэмцээн ойрын зай болон бөөн гараатай уралдаан болох бөгөөд тэмцээн маргааш өндөрлөнө. Ойрын зайн багийн уралдаанд нэг багаас гурван тамирчинд уралдаанд гарч тойрог бүрт багийн гишүүд хасагдаж, сүүлийн нэг тамирчин барианд орох зарчмаар ялагч тодорно. Мөн бөөн гарааны уралдаанд эрэгтэй 20, эмэгтэй 10 тойрогт өрсөлдөж багийн дүнгээр тэргүүн байрт эзэлсэн баг Монголын тэшүүрийн холбооны шилжин явах цом, өргөмжлөл 1 сая төгрөг хүртэх бол хоёр, гуравдугаар байрт орсон баг 800, 600 мянган төгрөгийн урамшуулалтай юм байна.