2021 оны IV улирлын байдлаар оффисын зориулалттай талбайн худалдах дундаж үнэ нэг метр квадрат нь 4.1 сая төгрөг болжээ. Өмнөх оны мөн үеэс 11 хувиар өссөнийг “Тэнхлэг зууч” мэдээллээ.
Хөл хорио, хязгаарлалтууд суларч, эдийн засаг эрчимжиж эхэлснээр оффисын эрэлт нэмэгджээ. Мөн барилгын материалын үнийн өсөлт шинээр ашиглалтад орж буй оффисуудын үнэ өсөхөд гол нөлөө үзүүлсэн гэж салбарынхан онцолж байна.
Тайлант хугацаанд Сүхбаатар дүүрэгт оффисын талбайн худалдах үнэ нэг метр квадрат нь зургаан сая төгрөг хүрсэн нь бусад дүүрэгтэй харьцуулахад өндөр дүнд тооцогдож байна. Харин Баянзүрх, Чингэлтэй дүүрэгт оффисын талбайн худалдах дундаж үнэ өмнөх жилийнхээс 30-33 хувиар өсжээ.
Оффисын талбайн түрээсийн дундаж үнэ мөн өссөн. Тухайлбал 2021 оны IV улиралд оффисын талбайн түрээслэх дундаж үнэ нэг метр квадрат нь 32 мянган төгрөг болж, өмнөх улирлаас таван хувиар өсжээ.
Оффисын эрэлт энэ онд нэмэгдэх төлөвтэй байна. Ялангуяа төвийн бүсийн байршлын оффисын эрэлт, хэрэгцээ өсөх хандлага ажиглагдаж байгааг “Мongolian Properties” онцолж байлаа. Мөн оффисын эрэлт нэлээд өсөх хандлагатай байгааг “Remax Mongolia” тооцоолж байна. Харин тээвэр логистикийн асуудлаас үүдэн нийлүүлэлт талаасаа хүндрэлтэй байх төлөв ажиглагдаж байгааг “Remax Mongolia” тодотгож байсан юм.