БНСУ-ын Үндсэн хуулийн шүүхээс өнгөрсөн баасан гарагт Ерөнхийлөгч Пак Гын Хэг огцруулах шийдвэр гаргасан нь олон улсын хувьд хамгийн том онцлох үйл явдал болж байна. Шүүхийн шийдвэр гарсны дараагаас Сөүл хотын цагдаагийн алба бэлэн байдалд ажилласан. Учир нь шүүхийн гадна Пак Гын Хэг дэмжигч, эсэргүүцэгчид тайван замаар жагсаж эхэлсэн ч нөхцөл байдал ширүүсч, жагсаж байсан хоёр хүн амиа алдсаны нэг нь Пак Гын Хэг дэмжигч байсан талаар Сөүл хотын цагдаагийн газраас мэдээлсэн.
БНСУ-ын Ерөнхийлөгчийн сонгуулийг тавдугаар сарын 9-нөөс өмнө явуулах талаар тус улсын Сонгуулийн төв хорооноос өчигдөр албан ёсоор мэдэгджээ. Тус хорооны дарга Ким Ён Деок сонгуулийг шударга, чөлөөт зарчмаар явуулахаа амлав.
Улс төрийн карьер нь үндсэндээ дуусгавар болж буй Пак Гын Хэгийн зүгээс одоогоор албан ёсны тайлбар хийгээгүй байна. Ямартаа ч шүүхийн шийдвэр гарсан учраас өнөөдрөөс нэг сарын дотор гэхэд дараагийн Ерөнхийлөгчийг сонгох сонгууль явуулах шаардлагатай. Үүнтэй холбогдуулаад сонгуульд нэр дэвшигчдийн бүртгэлээ ч эхлүүлснээ ийнхүү тус улсын сонгуулийн хорооноос мэдэгдсэн.
.jpg)
Гэвч улс төрийн хүчнийхний хооронд үүсээд буй санал зөрөлдөөн сонгуулийн товд нөлөөлж болохыг үгүйсгээгүйбайна. Өмнөд Солонгосын төв хорооны дарга ард иргэддээ хандан зөрчилдөөнийг даван туулж, сонгуульд идэвхтэй оролцохыг уриалжээ.
Дараагийн Ерөнхийлөгч хэн болох нь олон нийтийн анхаарлыг татаад буй юм. Хамгийн магадлалтай нэр дэвшигчээр Ардчилсан намын дарга асан Мун Жэ Инийг үзэж байна. Олон нийтийн дунд явуулсан санал асуулгаар тэрээр хамгийн магадлалтай нэр дэвшигчээр тодорчээ.
Түүний араас чансаагаараа Чунчон-Намдо мужийн амбан захирагч Ан Хи Жон, Соннам хотын намын дарга Ли Жэ Мён, “Ардын нам”-ын гишүүн Ан Чоль Су нар орсон байна.
Өнгөрсөн оны сүүлээр парламентын гишүүдийн саналаар Пак Гын Хэгийн эрхийг түр түдгэлзүүлсний дараа Ерөнхий сайд Хван Кио Ан Ерөнхийлөгчийн үүрэг гүйцэтгэгчээр ажиллаж байна.