“Технологи, хөрөнгө оруулалт Монголд-2017” олон улсын үзэсгэлэн, хурал өнөөдөр Шангри-Ла зочид буудалд эхэллээ.
Уг үзэсгэлэн хуралд ХБНГУ, Австри, Щвейцарь, Австрали, Франц, Өмнөд Африкийн нэр хүндтэй компаниуд уул уурхай, барилга, хот төлөвлөлт, сэргээгдэх эрчим хүч, ерөнхий зориулалтын нисэх, хөдөө аж ахуй мах сүү боловсруулалтын чиглэлийн үйлдвэрлэлийн тоног төхөөрөмжийн компаниуд оролцож байна. Мөн энэ үеэр гадаадын компаниудын 40 гаруй төлөөлөгч технологио танилцууллаа.
“Технологи, хөрөнгө оруулалт Монголд-2017” шиг нэг дор таван салбарыг хамарсан технологийн олон үзэсгэлэн өмнө нь Монгол зохиогдож байгаагүйгээрээ онцлогтой аж. Энэ удаагийн үзэсгэлэн, хурлын хоёр дахь давуу тал нь барууны шилдэг технологиудыг танилцуулахаас гадна хөрөнгө оруулагчидтай холбогдож ажил хэргийн яриа, уулзалт зохион байгуулах боломжийг нээж өгч байгаа юм байна.
“Технологи, хөрөнгө оруулалт Монголд – 2017” ОУ-ын үзэсгэлэн хурлыг санаачлагч “Би Эм Монголиан Партнерс” ХХК-ийн захирал Ж.Мядагмаа олон улсын үзэсгэлэнд оролцох компаниудын талаар мэдээлэл өглөө. Тэрбээр “ Хуурай аргаар нүүрс баяжуулах дэлхийн хамгийн том үйлдвэрийг барьсан “Allmineral” компани ХБНГУ-аас ирлээ. Нүүрс зэсийг нойтноор баяжуулахад гарах их хэмжээний хаягдал усыг шүүж дахиж ашиглах боломжтой тоног төхөөрөмж үйлдвэрлэдэг “Андриц” компанийн Австри болон Өмнөд Африкийн салбарынх нь удирдах түвшний хүмүүс ирсэн” гэв.
“Технологи, хөрөнгө оруулалт Монголд-2017” олон улсын үзэсгэлэнгийн талаар Нийслэлийн үйлдвэрлэл инновацийн газрын дарга Б.Бат-Эрдэнэ “Энэ удаагийн олон улсын чуулга уулзалт эдийн засагт голлох таван салбарыг онцолж шилдэг технологиудыг танилцуулж байгаагаараа үр өгөөжтэй, онцлогтой. Бизнес эрхлэгчдэд боломж олгосон хурал болж байна” гэв.
“Монголын уул уурхайн үйлдвэрлэлд нэмүү өртөг шингээх боломж”, “Сэргээгдэх эрчим хүч”, “Хотын хөгжил” зэрэг сэдвүүдээр хэлэлцүүлэг хийсэн юм.