Шатрын насанд хүрэгчдийн УАШТ-ний шигшээ тоглолт Завхан аймгийн Улиастай хотод болж өндөрлөлөө. Монголын бүх ард түмний спортын XIV их наадмын хүрээнд болсон тус тэмцээнд хагас шигшээ тэмцээнээс шалгарсан эрэгтэй, эмэгтэй тус бүр 12 тамирчин өрсөлдсөн юм. Эрэгтэйчүүдийн ангилалд Олон улсын мастер Г.Мөнхгал 11 тоглолтоос ес хожин, түрүүлжээ. Эмэгтэйчүүдийн ангилалд Олон улсын мастер, эмэгтэйчүүдийн их мастер Т.Батчимэг 11 өргөөс ес хожин, хоёр тэнцсэн амжилтаар түрүүлсэн байна. Тэрээр тэмцээн дуусахаас хоёр өргийн өмнө хошой аварга болох болзлоо хангажээ.