Орон нутгийн ИТХ-д орон гарсан тохиолдолд нөхөн болон дахин сонгуулийг тухайн жилийн зургадугаар сарын сүүлчийн долоо хоногийн ням гаригт, аравдугаар сарын эхний долоо хоногийн ням гаригт зохион байгуулдаг. Үүний дагуу ирэх аравдугаар сарын 7-нд хэд хэдэн газар нөхөн болон дахин сонгууль явагдах юм. Тухайлбал, Сүхбаатар аймгийн ИТХ-ын 14 дүгээр тойрог буюу Баруун-Урт сумын хоёрдугаар багт нөхөн сонгууль явагдах юм байна. Тус сонгуульд АН-аас аймгийн Засаг дарга асан Ж.Батсуурь, МАН-аас С.Цэрэндондов нар нэр дэвшихээр бүртгүүлжээ. Харин МАХН-аас нэр дэвшсэн Ц.Тод-Эрдэнийг сонгуулийн тухай хуулийн хоёр үндэслэлээр бүртгэхээс татгалзсан байна.