Америкийн алдарт үндэсний сагсанбөмбөгийн лигийн плэй-оффын цувралууд үргэлжлэн явагдаж байна. Өнөөдөр NBA-гийн талбайд нийт хоёр тоглолт боллоо.
Хоёрдугаар шатанд учраа таарсан Клэвланд Кавальерс, Торонто Рэпторс багууд цувралын эхний тоглолтоо хийлээ. Хүнд хэцүү долоон тоглолтын дараа дараагийн шатны тоглолтоо хийсэн Кливлэнд Кавальерсчууд өнөөдөр Торонтогийн талбай дээр тоглосон юм. Тэд тоглолтын эхнээс үлэг гүрвэлүүдийн тоглолтын темпэнд орж оноо дутуу явсаар дөрөвдүгээр үетэй нүүр тулав. Багийн гол тоглогч Лэброн Жэймс болон Жр Смит, Тристан Томпсон нар морьтон цэргүүдээс онцлохоор сайн байв. Харин эсрэг багаас Жонас Валичиунас самбарыг эзэгнэсэн. Ялангуяа Кэвин Ловыг ердөө 23 хувьтай довтлуулсан нь гайхалтай. Мэдээж морьтон цэргүүдэд самбарын цэвэр классик хэмжээний тамирчин байхгүй нь нөлөөлсөн байх. Хэрвээ Торонто Рэпторсыг хожоод дараагийн шатанд шалгарлаа гэж бодоход тэднийг Жоэл Эмбийд аль эсвэл Ал хорфорд гэсэн хүчирхэг төвүүд хүлээж байх юм.
Торонто Рэпторс ганцхан төвийн байрлалд илүү байгаагүй. Хамгаалагчийн хослол болох Дэмар Дэрозан, Кайл Лаури нар тоглолтыг бүрэн удирдаж байв. Гэсэн ч долоон улирал дараалан финалд шалгарсан Лэброн Жэймсийг барж иднэ гэдэг хэцүү билээ. Тэрээр өөрийн гайхалтай тоглолтыг үзүүлэн дөрөвдүгээр үеийн сүүл хэсэгт ирэв. Морьтон цэргүүд эцсийн мөчид нэг онооны илүү гарсан байв. Тоглолт дуусахад 16 секунд үлдсэн байхад Дэмар Дэрозан оноогоор илүү гарч болохуйц довтолгоог хийсэн ч алдаж тоглолтод 113-112-ийн харьцаатай Клэвланд Кавальерсчуудын илүүрхлээр дууслаа.
Голдэн Стэйт Варриорсын Нью Орлэанс Пэликанстай хийж буй цувралын хоёр дахь тоглолт өнөөдөр Ораклэ аринад боллоо. Дайчдын лидер Стефан Көрри бэртлээсээ эргэн ирсэн нь уг тоглолтын онцлох үйл явдал байв. Тоглолтын эхнээс Нью Орлэанс Пэликанс эрчтэй байж оноо илүү авч байв. Гарааны бүхий л байрлалдаа Голдэн Стэйтийг идэж уусан гэхэл хэлсдэхгүй. Гэвч сэлгээний бүрэлдхүүн нь дайчдын хэмжээнээс хэдэн шат дутуу гэдэг нь харагдсан юм. Хэрвээ Пэликанс хуучин аваргуудыг энэ цувралд ялахыг хүсэж байвал сэлгээний бүрэлдхүүнээ сайжруулах зайлшгүй хэрэгцээтэй гэдэг нь харагдав. Улмаар сэлгээний бүрэлдхүүний тоглосон нэгдүгээр үеийн сүүл, хоёрдугаар үеийн эхэн хэсэгт оноо дутуу байсан бөгөөд бусад гурван үед Пэликанс илүү байсан гэж хэлэхэд хэлсдэхгүй.
Бэртлээсээ эргэн ирсэн Стефан Көрри 27 минутад 28 оноо авч галзуурав. Мөн Кэвин Дурант 29 оноо түүж, Дрэймонд Грийн 20 оноо, 12 оновчтой дамжуулалт өгч дайчид бүрэн хүчээр тоглов. Талбай дээрээ тэд супер тоглолтоо үзүүлсэн ч тооны харьцаа 121-116 байгаа нь Пэликансд боломж байгааг харуулж байна. Тэднээс Энтони Дэвис 25 оноо, 15 самбараас бөмбөг авалт, Жрү Холидэй 24 оноо, Ражон Рондо 22 оноо, 12 оновчтой дамжуулалт, 5 бөмбөг таслалт хийв.
Б.АМАРТҮВШИН