2018 онд Дархан-Уул аймгийн хэмжээнд Улсын болон Орон нутгийн хөрөнгө оруулалтаар 19 тэрбумын өртөг бүхий 191 төсөл, хөтөлбөр хэрэгжиж байгаа юм. Эдгээр төслийн ажлуудаас Дархан хотод хийгдэж буй 16-н бүтээн байгуулалтын ажлын явцтай өнөөдөр /2018.08.03/ иргэдийн төлөөлөл болох аймгийн Ахмадийн зөвлөх багийн ахмадууд газар дээр нь очиж, биечлэн танилцаж, хяналаа. Үүний зэрэгцээ аймгийн ЗДТГ-ын удирдлагууд болон “Дархан-Хот байгуулалт, барилга захиалагчийн газар”-ын ажлын албаныхан хяналт тавьж, ажлын явцад дүгнэлт өгсөн юм.
Бүтээн байгуулалтын ажилтай танилцах маршрут 2200 хүний суудалтай Спорт цогцолбороос эхэлсэн. Спорт цогцолбор нь Улсын төсвийн хөрөнгө оруулалтын 21 тэрбум төгрөгөөр хийгдэж байгаа бөгөөд эхний ээлжид 2200 хүний спорт танхим, Усан бассеныг ашиглалтад оруулахаар ажиллаж байгаа тухай гүйцэтгэгч байгууллага болох Нэмбар ХХК-ийн Ерөнхий инженер М.Батсайхан хэлж байна. Дээрх 2 спорт танхимын гүйцэтгэл 80 хувьтай үргэлжилж байна.
