Сонгуулийн ерөнхий хорооны гадаа АН-ын дэмжигчид болон МоАХ-ны гишүүд жагсаал хийлээ. Монголын ардчилсан холбооноос дахин санал хураалтыг урагшлуулж, долдугаар сарын 6-нд товлохыг шаардсан бичгийг СЕХ-нд хүргүүлсэн юм. Их аварга Д.Дагвадорж, Төрийн соёрхолт Д.Сосорбарам нар уг шаардлагыг уншиж танилцууллаа. Эрх баригч МАН эрх мэдлээ ашиглан сонгуулийг будлиантуулж байна. Сонгуульд АН-аас нэр дэвшигч Х.Баттулга тэргүүлсэн хэдий ч дахин санал хураалт явуулахаар болсон нь СЕХ хуулиа биелүүлэхгүй, шударга бус ажиллаж байгаатай холбоотой гэж жагсагчид үзжээ. МоАХ-ноос шаардах бичгийн хариуг 6 сарын 29-ны өдөр авахыг хүсч байна.
Жагсагчид “Монголын ард түмэнд сонголтоо баталгаажуулах боломж олго”, “Долдугаар сарын 6-нд санал хураалт явуулахыг шаардаж байна”, “СЕХ хуулиа дээдлэхийг шаардаж байна” гэх мэтээр хашгирч байлаа. СЕХ хуралдаж, долдугаар сары 9-нд товлосон санал хураалтын товыг наашлуулж, долдугаар сарын 7-нд болгохоор зарласан билээ.
Б.ОДГЭРЭЛ