Сирийн нутаг дэвсгэрт ОХУ-ын “Ка-52” нисдэг тэрэг сүйрч, хоёр нисгэгч нь амиа алджээ. Энэ талаар өнгөрсөн даваа гаригт ОХУ-ын Батлан хамгаалах яамнаас сэтгүүлчдэд мэдээлснийг ТАСС агентлаг уламжлав.
Мэдээлэлд, “ОХУ-ын “Ка-52” нисдэг тэрэг Арабын бүгд найрамдах Сири улсын зүүн бүсэд төлөвлөсөн нислэг хийх үедээ сүйрч, хоёр нисгэгчийн амь үрэгдлээ гэж бичжээ. Эрэн хайх, аврах баг нисгэгчдийн цогцсыг Оросын цэргийн баазын нисэх буудалд хүргэж өгсөн байна. ОХУ-ын Батлан хамгаалах яамнаас “Урьдчилсан мэдээллээр нисдэг тэрэг сүйрсэн шалтгаан нь техникийн доголдолтой холбоотой байж болзошгүй” гэж мэдээлжээ.
Тавдугаар сарын 3-ны өдөр “ОХУ-ын Су-30СМ” сөнөөгч онгоц Хмеймимийн нисэх буудлаас хөөрч, Газар дундын тэнгис дээгүүр нисч байх үедээ сүйрч, хоёр нисгэгч нь амиа алдсан билээ. Тус улсын Батлан хамгаалах яамнаас “Ослын шалтгаан нь онгоцны хөдөлгүүрт шувуу орсон байж болзошгүй. Онгоцонд гал гарах ямар ч нөхцөл байхгүй” гэж мэдээлжээ. Энэ нь ОХУ-ын цэргийн нисэх хүчний түүхэнд “Су-30СМ” сөнөөгч онгоц сүйрсэн анхны тохиолдол болсон байна.