Шотландад
өчигдөр бие даан тусгаар тогтносон улс болох эсвэл Их Британийн бүрэлдэхүүнд
хэвээр үлдэх эсэхийг шийдвэрлэх бүх нийтийн санал асуулга явагдлаа. Саналын
хуудас зөвхөн нэг асуулттай бөгөөд тэр нь “Та Шотландыг тусгаар тогтносон улс
болохыг зөвшөөрч байна уу”. Сонгогчид тийм, үгүй гэсэн хоёр сонголтоос зөвхөн
нэгийг нь сонгож, санал өгөх юм.
Нийт 4285323 хүн санал өгөх эрхтэй бөгөөд түүхэнд байгаагүй өндөр ирцтэй санал
асуулга болох төлөвтэй байв. Улс даяар 2608 сонгуулийн штаб ажиллаж, иргэд орон
нутгийн цагаар өглөөний 07.00-22.00 цагийн хооронд саналаа өгчээ. Энэхүү
асуулгын дүн өнөөдөр тодорхой болох юм. Саналыг Шотландын 32 захиргааны нэгжийн
байранд тоолж, дүнг холбогдох ажилтнуудад мэдээлэх бөгөөд Эдинбургийн санал
тооллогын комисс мэдээллийг нэгтгэн тус комиссын дарга Мэри Питкейтли эцсийн
дүнг Эдинбургийн шилтгээний өмнөх талбайд зарлах аж. Тэрбээр асуулгын
дүнг баасан гарагийн өглөөний цайныхаа цагаар зарлах болно гэж хэлжээ.
Тиймээс Шотландын сонгуулийн уламжлалын дагуу өнөөдөр 06.30-07.30 цагийн үед
олонд мэдээлэх магадлал хамгийн өндөр байгаа талаар BBC агентлаг мэдээллээ.
Учир нь 2010 оны Их Британийн парламентийн сонгууль, 2011 оны Шотландын
парламентийн сонгуулийн санал хураалтийн дүнг энэ цагуудад зарлаж байсан юм
байна. Бүс нутгуудын санал асуулгын дүн өглөөний 03.00-06.00 цагийн хооронд
санал тооллогын комисст ирнэ гэж төлөвлөжээ. Түүнчлэн түүхэндээ байгаагүй олон
хүн санал өгөх учраас дэг журамд тооллогын ажилтнууд хяналт тавьж ажиллахаар
болсон бөгөөд цаг агаарын байдал, алслагдмал нутгуудын саналын хайрцаг
товлосон цагаас оройтох магадлалтай учир усан онгоц, нисдэг тэрэг зэрэг
тээврийн хэрэгслийг ашиглан саналын хайрцгуудыг тээвэрлэх ажлыг зохион
байгуулжээ. Энэ санал асуулгаар Шотландын иргэд Их Британийн эзэнт гүрний
бүрэлдэхүүнээс гарч тусгаар тогтнохыг дэмжвэл 2016 оны гуравдугаар сарын 24-ний
өдөр тус улс тусгаар тогтнолоо албан ёсоор зарлана гэж төлөвлөөд байгаа билээ.