Монголын боксын эмэгтэй шигшээ багийн тамирчид БНХАУ-ын Хөх хотноо хамтарсан бэлтгэлд хамрагдаж байна. Мөн эрэгтэй шигшээ баг тамирчид Индонез улсад болох Ерөнхийлөгчийн олон улсын цомын тэмцээнд төвлөрчээ. Монголын боксын шигшээ багийн тамирчид улсын аварга шалгаруулах тэмцээндээ амжилттай өрсөлдөж зарим жинд шинэ тамирчид шигшээ багт харьяалагдах болсон билээ. Тус холбооны зүгээс эмэгтэй шигшээ багийн амжилтад түлхүү анхаарч энэ оны олон улсын хамтарсан хэд хэдэн бэлтгэлд хамруулах төлөвлөгөөтэй аж.
Тэд эхний ээлжинд Хөх хотын шигшээ багийн тамирчидтай хамтарсан бэлтгэл хийлгэж байна. МБХ-ны хэвлэлийн албаны дарга Ц.Батнасангийн ярьснаар мөн эрэгтэй шигшээ багийн хувьд ирэх сард Индонез улсад болох Ерөнхийлөгчийн олон улсын цомын тэмцээнд анхаарлаа хандуулаад байна. Холбооны зүгээс ирэх аравдугаар сарын 5-18-нд Катар улсад болох насанд хүрэгчдийн дэлхийн аварга шалгаруулах тэмцээний цаг агаарт дасан зохиоцох бэлтгэлээ одооноос эрчимжүүлж, цаг агаарт тохирсон оронд хамтарсан бэлтгэл, тэмцээн уралдаанд оролцоно. Үүний эхлэл нь Индонезид болох тэмцээн аж.