Хүүхдийн хөлбөмбөгийн “Шинэ Яармаг” клубээс өнгөрөгч наймдугаар сарын 22-24-ний өдрүүдэд “Шинэ Яармагийн цом-2015” өсвөр үеийн тэмцээнийг зохион байгууллаа. Хан-Уул дүүргийн 41-р сургуулийн хөлбөмбөгийн талбай дээр болсон энэхүү тэмцээн хөвгүүдийн 11, 13 нас, охидын 13, 15 насны ангиллаар болсон юм.
Анх удаа болсон энэхүү тэмцээнд 10 байгууллага, клубын 23 багийн 350 гаруй тамирчид оролцсон бөгөөд “Шинэ Яармаг” клубын үйл ажиллагааг сурталчлах, хүүхдийн хөлбөмбөгийн тэмцээний тоог нэмэгдүүлэх зорилгоор тус клубыг үүсгэн байгуулагч Н.Нэргүйн нэрэмжит болгон зохион байгууллаа. Энэхүү тэмцээн цаашид жил бүр уламжлал болгон зохион явуулах юм байна.
Тэмцээнд Монголын хүүхдийн хөлбөмбөгийн лиг, УАШТ, “Дуулиан 2020” тэмцээний эхний байрын төлөө өрсөлддөг шилдэг багууд өрсөлдсөн нь тэмцээнийг улам сонирхолтой, өрсөлдөөнтэй болгожээ. Хамгийн холоос Төв аймгийн “Төв ургац” баг оролцож, хэсгээс шалгарахад тун ойрхон амжилт үзүүлсэн байна.
Тэмцээний хөвгүүдийн 13 насны ангилалд нийт 8 баг өрсөлдөж, С.Самдан ахлагчтай “Мазаалай 52” клубын баг тэргүүлж, Б.Мөнхжаргал ахлагчтай Баянзүрх дүүрэг, Э.Алтангэрэл ахлагчтай “Арвис” клуб удаалав.
Хамгийн холоос Төв аймгийн “Төв ургац” баг оролцож, хэсгээс шалгарахад тун ойрхон амжилт үзүүлсэн байна.
Хөвгүүдийн 11 насны ангилалд А.Мэнд-Амар ахлагчтай “Арвис” клуб цомын эзнээр тодорч, мөнгө, хүрэл медалийн эздээр Баянзүрх дүүрэг, “Хүчит чулуут ДМЮ” клубын багууд шалгарчээ.
Тэмцээний охидын 15 насны ангилалд 5 баг тойргийн журмаар өрсөлдснөөс Б.Маналжав ахлагчтай “Хан-Уул 41” баг тэргүүлж цомын эзнээр тодорсон бол хоёр, гуравдугаар байрт Баянзүрх дүүрэг, “Туулын том тулнууд” багууд шалгарсан юм.
Харин охидын 13 насны ангилалд “Хан-Уул 41”, “Шинэ Яармаг” багууд хоёр удаа тоглож, тус бүрт тооны харьцаа 1:1-ээр тэнцэж, торгуулийн цохилтоор 4:2 харьцаагаар “Хан-Уул 41” баг тэргүүлэв.
Тэмцээнийг УИХ-ын гишүүн Х.Баттулгын ивээл дор зохион байгуулж, хүүхдэд зориулсан “Маамуу шүүс” брэнд бүтээгдэхүүн, “Хаан банк-Яармаг”, цахилгаан, сантехникийн “Хүрд” компани, “Орем трейд” ХХК, “Пирамид Индастри” ХХК, Хан-Уул дүүргийн 5-р хороо зэрэг байгууллагууд дэмжин ажилласан байна.
