Ерээд оны эхээр Ерөнхийлөгч асан П.Очирбат нэгэн шинэ жилийн баярт очоод үзээгүйгээ үзэн “Үнэхээр тансаг шинэ жил боллоо” гээд бөөн хэл амны бай болж байв. Түүнээс хойшхи шинэ жилийн баяр ёслолууд жигтэйхэн тансаг болж, хүмүүс нүдээ бүлтэртэл гоёж гоодон, хэнд ямар бэлэг өгөхөөрөө хүртэл уралдаж гарцгаасан. Төрийн байгууллагууд ч юу дутахав хэмээн төсвийн мөнгийг агаарт цацан ёстой нэг самарч өгдөг байв. Харин одоогоос хоёр жилийн өмнөхөн мэндчилгээг хэвлэмэл цаасаар биш цахимаар хүргэх уриалгыг төсвийн байгууллагынханд бага сага дадуулж бас ч хэмнэлт гаргасан нь манайх шиг цаас үйлдвэрлэдэггүй оронд нэг том алхам болсон. Ерөнхийлөгч Ц.Элбэгдорж ард түмэндээ шинэ жилийн мэнд хүргэж үг хэлэхдээ шарзтай жүнз биш сүүтэй хундага өргөсөн нь тансагчуулын эгдүүг бяцхан хүргээд авсан. Тэр ч бүү хэл хөдөөгийн нэг сумын Засаг дарга “Тэр тэндээ сүүгээ өргөнө биз, бид энд архиа ууна” гэсэн нь орон даяар олон нийтийн дунд тархсан онигооны баатар болгоод амжсан. Юм гольдролдоо орно гэдэг сайхан. Энэ жилийн баяр ёслолыг ажиглаад байхад бүсгүйчүүд эрээн мяраан эрвээхэй шиг даашинзаар гоёхоо больж, үсээ энгийн сайхан янзалсан нь анзаарагдаж, эрчүүд гашуун нясуун идээг сэржимдэх төдий болоод тавьж буй нь сайшаалтай санагдав. Энэ нь нэг талаар эдийн засагтай холбоотой байж болох боловч хамгийн гол нь нийгэмд эрүүл сэтгэлгээний түрлэг нэмэгдэж байгаагийн илрэл билээ.
Л.БАТЦЭНГЭЛ