“Монголын сурагчдын дүрэмт хувцас үйлдвэрлэгчдийн холбоо”-ноос Ерөнхий сайд Н.Алтанхуягт ханджээ. Тус холбоо сурагчдын дүрэмт хувцсыг хэчнээн компани оёж байгаа, хэдэн ширхэгийг үйлдвэрлэж нийлүүлсэн, өртөг зардал, үнийн бүтцийг ил болгохыг гүйцэтгэх засаглалын тэргүүнээс хүссэн байна. Уг ил захидалд “Шинэчлэлийн тодотголтой Засгийн газар байгуулагдсаныг “Монголын сурагчдын дүрэмт хувцасны оёдлын холбоо” анхнаас нь дэмжсээр ирсэн, цаашид ч дэмжихэд бэлэн байна. Гэхдээ өнгөрсөн оноос эхлэн сурагчийн дүрэмт хувцасны үйлдвэрлэлд төр оролцож ихээхэн хэмжээний херөнгө зарсан нь өнөөдөр ямар үр дүн өгснийг асуух эрх бидэнд бий.
Өмнөх жилүүдэд төрөөс мөнгө гаргалгүйгээр сурагчдыг хувийн хэвшлийнхэн тодорхой хэмжээгээр хангаж, аажмаар бүрэн хангах боломж бүрдэж байсан. Гэтэл өнгөрсөн жил түүхэндээ анх удаа сурагчдын дүрэмт хувцасны хангалт буураад зогсохгүй, үнэ огцом нэмэгдсэнд эцэг эхчүүд гомдолтой байгаа. Та УИХ-ын чуулган дээр “Томдсон дүрэмт хувцас солиход асуудал байхгүй” хэмээн уцаарлаж байна. Үнэн хэрэгтээ энэ нь нэг хувцасны тухай асуудал биш гэдгийг сурагчид, эцэг эхчүүд мэдэж байгаа.
Өнгөрсөн намар танд сурагчдыг дүрэмт хувцсаар бүрэн хангах амлалт өгсний дараа гавьяат цолыг хүртэж байсан “Монголын оёдлын холбоо”-ны тэргүүн Жаргалмаа тайлангаа тавих цаг болсон гэж үзэж байна. Манай холбооны бүрэлдэхүүнд багтдаг компаниуд өнгөрсөн хугацаанд төрөөс нийлүүлсэн дүрэмт хувцасны үнээс гурав дахин хямдаар нийлүүлэх санал тавьсан боловч өнөөг хүртэл хүлээн авах албан тушаалтан байсангүй. Энэ нь төсвөөс гаргасан их хэмжээний мөнгө сурагчдыг дүрэмт хувцсаар хангах зорилтоосоо хальж, албан тушаалтнуудын ашиг сонирхолд зориулагдсан байж магадгүй гэсэн хардлагыг төрүүлж байна. Учир нь төрийн өндөр үнэтэй дүрэмт хувцасыг албан тушаалтнуудын оролцоотойгоор сургуулиудад нийлүүлэхийг шаардсан байдаг. Харин бид 45 мянган төгрөгт багтаан үйлдвэрлэсэн дүрэмт хувцас нийлүүлэхийг санал болгосон. Иймээс таныг дараах асуултад албан ёcoop хариулт өгөхийг хүсье.
Амлалт өгсөн албан тушаалтнууд ямар компаниудаар үйлдвэрлүүлж, хэдэн дүрэмт хувцасаар аль сургуулиудыг хангасан. /Компанийн нэр, хангасан сургуулийн хаяг, нийлүүпсэн дүрэмт хувцасны тоо/, сурагчдын дүрэмт хувцасны үнэ, үнийн бүтцийг ил болгоно уу” гэжээ.