Нийслэлийн
ИТХ-ын төлөөлөгчид улирал тутамд 13 сая төгрөг авдаг гэх шуугиан өчигдөр цахим хуудаст
өрнөлөө.
Нэгэн жиргээч
НИТХ-ын “Шилэн данс”-ны мэдээллийг сайтаас ухаж олоод нийтэд түгээснээр нийслэлийнхний
гар утасны төлбөр, унаанд зарцуулдаг мөнгө хичнээн их болохыг сошиал медиад идэвхтэй
байдаг хэсэг мэдэж авлаа. Шилэн дансны тухай хуулиар таваас дээш төгрөгийн гүйлгээгээ
байгууллагууд сайтдаа мэдээлж байх үүрэг хүлээсэн. Гэвч ихэнх байгууллагын сайт
дээрх “Шилэн данс” ажиллахгүй байгаа талаар Засгийн газрын түвшинд яригдсан билээ.
Сайтууд дээрх сервер гацах, өгөгдсөн мэдээлэл харагдахгүй байх гээд техникийн саатал
бишгүй байдаг. Бас зорилго тавьж хайхгүй л бол байгууллагын сайтуудаас мэдээлэл
олж авахад бэрх. Интернэт идэвхтэй хэрэглэдэггүй хүнд бол “Шилэн данс” хаалттай.
Тиймээс “Шилэн данс”-ны мэдээллийг сонинд нийтэлдэг болмоор байна. Сайт дээрх мэдээллийг
устгаж өөрчилж болдог бол сониных тэр хэвээрээ баримт болж үлддэг. Сониноо барьж,
баримтуудыг тэмдэглэж, түүндээ итгэж уншдаг олон хүн бий. Сонин дээр гарсан мэдээлэл
илүү олон хүнд хүрдгээс гадна итгэл үнэмшил төрүүлдэг. Мөн сонин дээр байгаа мэдээллийг
сайтынх шиг ухаж олох шаардлагагүй. Интернэтгүй орчинд ч нийтээрээ мэдээлэл авах
боломжтой. Тиймээс “Шилэн данс”-ыг идэвхжүүлж, иргэдийн хяналтыг сайжруулахын тулд
сониныг ашигламаар байна. “Шилэн данс”-ыг сониноос уншиж, итгэх хүсэлтэй олон уншигч
бий.