Хан-Уул дүүргийн нутаг дэвсгэрт байрлах хоёр шатахуун түгээх станцыг дээрэмдсэн хэргийг илрүүлж, гэмт этгээдүүдийг баривчилсан талаар Цагдаагийн ерөнхий газраас мэдээллээ. Тодруулбал, энэ сарын 7-ны шөнө Хан-Уул дүүргийн 14 дүгээр хороо Айдсын даваанаас Өлзийт хороолол орох зам дагуу байрлах шатахуун түгээх станцын түгээгчийн хоолойд хутга тулган бэлэн мөнгө, камерын бичлэг хадгалдаг компьютерийн процессорыг дээрэмдсэн хэрэг гарчээ.
Мөн энэ сарын 15-ны шөнийн 05:00 цагийн үед Хан-Уул дүүргийн 10 дугаар хороо Нисэхийн постны замын хойд талд байрлах шатахуун түгээх станцын түгээгч Д, С нарт хүч хэрэглэн айлган сүрдүүлж 1.5 сая орчим төгрөгийг дээрэмдэн авч явсан байна.
Нийслэлийн цагдаагийн газрын Мөрдөн шалгах газрын Хүнд гэмт хэрэг мөрдөх хэлтсийн болон Хан-Уул дүүрэг дэх цагдаагийн хоёрдугаар хэлтсийн алба хаагчид хамтарсан ажлыг хэсэг байгуулан шуурхай ажилласны дүнд гэмт этгээдүүдийг цаг алдалгүй баривчилсан гэнэ.
Уг хэргүүдийг Чингэлтэй дүүрэгт оршин суух 23 настай, эрэгтэй Ө нь найз 20 настай эрэгтэй Б, 23 настай, эрэгтэй Х нартай бүлэглэн тээврийн хэрэгсэл ашиглаж үйлдсэн болох нь шалгалтын явцад тогтоогдсон байна. Сэжигтэн Ө, Б нарыг Улаанбаатар хотоос, сэжигтэн Х-г Төв аймгаас дайчлан баривчилжээ.