Саудын Араб улсад өчигдөр 17.00 цагийн орчимд Шейх Нимр ал-Нимр болон 46 хүнийг терроризмын хэрэгт буруутгаж, цаазалсан тухай “CNN” агентлаг мэдээллээ.
Шейх Нимр ал-Нимр болон түүний дэмжигчид нь 2011 оны дөрөвдүгээр сард Шиа хүмүүсийг гадуурхаж буйг буруутгаж, Арабын зүүн хэсэгт Засгийн газрын эсрэг жагсаалыг зохион байгуулсан юм.
Тэрээр 2013 оны нэгдүгээр сард баривчлагдсан бөгөөд өнгөрсөн аравдугаар сард түүнд цаазаар авах ялаар шийтгэсэн билээ. “Цаазлагдсан 47 хүний дунд Чад болон Египетийн нэг нэг иргэн, бусад нь Арабын иргэншилтэй байсан” хэмээн “AFP” агентлаг эх сурвалжаас иш татан мэдээлжээ. Шиа урсгал зонхилдог Иран улс Шейх Нимрийг цаазлах тухай асуудалд Саудын Арабын удирдлагуудыг буруутгаж, хэрвээ түүний аминд хүрсэн тохиолдолд олныг хамарсан жагсаал зохион байгуулахаа сануулсан юм.
Шейх Нимрийг цаазалсны дараа Тегеран дахь Саудын Арабын элчин сайдын яам руу босогчид дайрч, галдан шатаажээ.
Цагдаагийнхан яам руу халдсан этгээдүүдээс 11 хүнийг баривчилсан байна. АНУ-ын Төрийн нарийн бичгийн дарга Жон Керри “Саудын Арабын энэ үйлдлээс болж Ойрхи Дорнод дахь шашны мөргөлдөөнийг хурцатгаж магадгүй” гэж мэдэгджээ.
